Almatyda taýda mertikken týrıst tabylmaı jatyr
ALMATY. QazAqparat – Almatyda qutqarýshylar aıaǵyn qaıyryp alyp, taýdan túse almaı qalǵan adamdy ekinshi táýlik boıy izdestirip jatyr, dep habarlaıdy QazAqparat tilshisi.
Almaty qalalyq Qutqarý qyzmetiniń baspasóz qyzmeti málim etkendeı, keshe keshki 16:00 shamasynda kezekshi pýltine Kók Jaılaý shatqalynda bir er adamnyń jaraqat alǵany týraly habarlama túsken.
Aıaǵyn qaıyryp alǵan týrıst taýdan ózdiginen túse almaǵan. Bul jaıly onyń qasyndaǵy saparlastary qutqarýshylarǵa qońyraý shalǵan.
«Oqıǵa ornyna 5 adamnan turatyn jasaq jiberildi. Qutqarýshylar bulaq basyna jetken soń ary qaraı jaıaý kóterilýge májbúr bolǵan. 300 metr qashyqtyqtan soń japa shekken adamnyń saparlastary qutqarýshylarǵa týrıstiń otyrǵan jerin shamamen kórsetken. Er adam ózenniń arǵy betinde qalǵan. Aýa raıynyń qolaısyzdyǵy, qalyń tuman izdestirý jumystaryna kedergi keltirdi. Qutqarýshylar keri qaıtýǵa májbúr boldy. Búgin osy marshrýt boıynsha taǵy qutqarý jasaǵy jiberildi. Biraq áli nátıje joq», - dedi qutqarý qyzmetinen.
Aıta ketý kerek, Almaty turǵyny Ásel Panarǵalıeva 10 qarasha kúni Úlken Almaty kóline jalǵyz saıahattap shyqqan. Sodan beri qyz úıine oralǵan joq.
