Almatyda taý soqpaqtaryn kórkeıtý qolǵa alyndy

Almaty taý týrızminiń tartymdylyǵyn arttyrý maqsatynda taý marshrýttaryn jandandyrýǵa baǵyttalǵan josparmen qalalyq Týrızm jáne syrtqy baılanystar basqarmasynyń basshysy Erlan Jaılaýbaı tanystyrdy.

«Jumys 3 baǵyttan turady. Eń aldymen taý soqpaqtary marshrýttarynda jergilikti flora men faýna týraly aqparattyq taqtaıshalary ornatylatyn bolady. Ekinshiden, taýǵa jaıaý sapar shegý barysyndaǵy júris-turys erejeleri men erekshe qorǵalatyn tabıǵı aýmaqtarǵa barý erejeleri týraly aqparat jarııalanatyn boldy. Sondaı-aq, soqpaq joldardy abattandyrý jáne olardyń barlyq áleýmettik toptar úshin qoljetimdiligin arttyrý asa mańyzdy. Qazir soqpaq joldardy baǵdarlaý, oryndyqtar men kempıngterdi ornalastyrý, sondaı-aq, soqpaq joldardyń keıbir bólikterinde múmkindikteri shekteýli adamdar úshin arnaıy jabyndardyń tóselý jumystary bastalyp ketti», - dedi E.Jaılaýbaı.

Revıtalızatsııa jumystary qazirgi tańda Medeý - Gorelnık, Medeý - Kókjaılaý jáne Medeý - Kimasar marshrýttarynda júrip jatyr.

Basqarma basshysynyń aıtýynsha, osy senbide taý soqpaqtaryn tazalaýǵa arnalǵan senbilik ótedi.

 «Elimizde qazirgi tańda týrızm ekonomıkanyń basty qozǵaýshy kúshi retinde tanylyp otyr. Al, taý týrızmi men ekologııalyq týrızm - bul salaýatty ómir salty men týǵan jerge degen súıispenshilik sezimin nasıhattaý bolyp tabylady, munyń ózektiligi, ásirese, «Týǵan jer» baǵdarlamasy aıasynda artyp otyr. Oǵan qosa, tabıǵatty qorǵaý men oǵan súıispenshilikpen qaraý, jaǵymdy týrıstik daǵdylardy qalyptastyrý men óskeleń urpaqtyń oı-órisin keńeıtý de alǵa qoıyp otyrǵan maqsattar qatarynda. Osy oraıda atalǵan máselelerge nemquraıly qaramaıtyn barlyq azamattardy soqpaq joldardy abattandyrýǵa arnalǵan senbilikke qatysýǵa shaqyramyz», - dedi ol.