Almatyda taý kýrorttaryn baılanystyratyn aspaly jol salynýy múmkin - mınıstrlik

ALMATY. QazAqparat - Qazaqstan taý shańǵysy derjavasy bolýǵa laıyq. Bul týraly QR Mádenıet jáne sport vıtse-mınıstri Erjan Erkinbaev aıtty, dep habarlaıdy QazAqparat tilshisi.

«Almaty jáne shyǵys óńiri shańǵy týrızmin damytýǵa óte qolaıly. Bizde qurǵaq qar, uzaq maýsym, jyldyń shýaqty kúnderi kóp. Sondyqtan Almaty aımaǵy bul baǵytta mindetti túrde qadam jasaýy kerek. Bul jerde áleýet bar ekenine senimdimin. Biz memlekettik qoldaý sharalaryn ázirlep, zańǵa engize aldyq, ol - taý shańǵysy kýrortyn salý kezinde qymbat qural-jabdyqtardyń qunynyń 25 paıyzyn jekemenshikke qaıtarý. Bul - shyǵynnyń tórtten biri. Negizi jaqsy qadam. Túzetý 2020 jyly kúshine endi, biraq pandemııaǵa baılanysty kýrorttarǵa ýaqyt bolmady. Qazir qaıta jandanyp jatyr. Jańa bastamalar paıda bolady dep oılaımyn», - dedi Erjan Erkinbaev Almatyda týrızm qaýymdastyǵynyń ókilderimen kezdesý barysynda.

Onyń aıtýynsha, Almaty qalasynyń ákimi Erbolat Dosaev shańǵy ınfraqurylymyn damytýǵa úlken mán berip otyr.

«Talǵar men Býtakovka shatqaldaryn aspaly jolmen jáne shańǵy trassalarymen baılanystyratyn joba – shynaıy joba. Mamandar kórshi shatqaldardy zerttedi. Onda birneshe kótergish salyp, shańǵy trassasyn 70 shaqyrymǵa uzartýǵa bolady. Shymbulaqtan Medeýge shatqal arqyly túsýge bolady», - dedi vıtse-mınıstr.

Erjan Erkinbaev bul mańyzdy jáne óte qajet joba ekenin atap ótti.

«Biraq bul jer ulttyq saıabaqqa tıesili. Bul jerge ákimdiktiń demalys ornyn salýǵa múmkindigi bar, sondyqtan máseleni júıeli túrde sheshý qajet. Bıznes ókilderi áli qyzyǵýshylyq tanytyp otyrǵan joq. Kásipkerler kótergishterge tehnıkalyq qyzmet kórsetý qymbatqa túsetinin aıtady. Bul másele búginde talqylanyp jatyr. Ulttyq saıabaqtyń aýmaǵynda múlde qol tıgizbeıtin jerler bar. Qazir týrızmdi damytýǵa qolaıly jerlerdi ákimdikke berý máselesi talqylaný ústinde. Qazirdiń ózinde Almaty óńiri taý shańǵysy alańdaryn keńeıtý, kýrorttyq aımaq salýdy qarastyryp jatyr. Mınıstrlik bul ıdeıany qoldap, mundaı jobany qarjylandyrýdyń jeńildetilgen quraldaryn izdeıdi», - dedi spıker.

Almaty oblysyndaǵy taý shańǵysy kýrorttary bir aspaly jolmen baılanystyrylatyny týraly aqparat 2019 jyly paıda bolǵan edi.