Almatyda taý klasterin damytýdyń sheberlik-jospary bekitildi
ALMATY. QazAqparat - Almaty qalasynyń aınalasy men onyń aglomeratsııasy aýmaǵynda taý klasterin damytýdyń sheberlik-jospary bekitildi. Jospar 2030 jylǵa deıingi ýaqytty qamtıdy, dep habarlaıdy QazAqparat tilshisi.
Qala ákimdiginiń baspasóz qyzmetinen málim etkendeı, jobany Almaty ákimdiginiń tapsyrysy boıynsha Avstrııanyń «Master Concept» kompanııasy jasady.
Jańa tujyrymdamaǵa sáıkes týrızm salasyn damytý maqsatynda óńirdiń barlyq taý lokatsııalary, onyń ishinde Túrgen, Aq bulaq, Oi-Qaragai Lesnaya Skazka, Tabaǵan, Býtakovka, Pıoner, Kókjaılaý, Shymbulaq jáne Qaskeleń qamtylatyn bolady.
«Master Concept» kompanııasynyń bas dırektory Gernot Lıaıtner Almaty óńiriniń taý klasteri úlken týrıstik áleýetke ıe ekendigin aıtty.
Sheberlik-jospar aıasynda 470 shaqyrym soqpaq joldy, 85 shaqyrym velosıped jolyn, 45 shaqyrym atpen júrý baǵytyn, 250 shaqyrym shańǵy trassasyn damytý qarastyrylǵan.
Almaty ákimi Baýyrjan Baıbek jumys sapary kezinde Almaty oblysy ákimdiginiń basshylyǵymen birge kóshpeli jıyn ótkizip, óńirdiń barlyq taý lokatsııalaryn qarap shyqty.
Qala basshysy taý aýmaǵynda qojetimdi sporttyq-otbasylyq kýrort uıymdastyrý úshin «TsSKA» taý-shańǵy bazasyn qalanyń kommýnaldyq menshigine berý jóninde máseleni qarastyrýdy tapsyrdy.
Sondaı-aq Baýyrjan Baıbek Pıoner, Oi-Qaragai Lesnaya Skazka taý kýrorttaryna alyp baratyn qalamańy tasymalyn uıymdastyrýdy tapsyrdy. Jańa avtobýs baǵyttary aptasyna úsh ret (juma - senbi - seksenbi) kúnderi 2-3 saǵattyq ıntervalmen qatynaıtyn bolady.
Aıta keterligi, taý klasterin damytý týraly sheberlik-jospardy ázirleýge Almaty qalasy men Almaty oblysynyń ákimdikteri, Іle-Alataý ulttyq parki, «Qazaq týrızm» jáne «Master Concept» kompanııalary qatysty. Sheberlik-jospardyń tujyrymdamasyn talqylaý tobyna memlekettik organdardyń, týrızm salasyndaǵy halyqaralyq kompanııalardyń, qoǵamdyq qorlardyń, týrıstik qaýymdastyqtardyń, joǵary oqý oryndarynyń, sporttyq týrızm federatsııasynyń ókilderi endi.
