Almatyda taý-ken salasyna arnalǵan halyqaralyq «MiningWorld Central Asia 2010» kórmesi ashyldy
Y. Qyrkúıektiń 15-i. QazAqparat /Erbol Azanbek/ -Búgin Almatydaǵy «Atakent» kórme iskerlik yntymaqtastyq ortalyǵynda ken-metallýrgııa salasyna arnalǵan halyqaralyq MiningWorld Central Asia 2010 kórmesi ashyldy, dep habarlaıdy QazAqparat.
Kórmege álemniń 25 elinen: Avstralııa, Avstrııa, Belarýs, Belgııa, Ulybrıtanııa, Germanııa, Iran, Ispanııa, Italııa, Qazaqstan, Kanada, Qytaı, Nıderland, Norvegııa, BAÁ, Perý, Polsha, AQSh, Túrkııa, Ýkraına, Fınlıandııa, Frantsııa, Shveıtsarııa, Shvetsııa, Ońtústik Koreıaden kelgen 215 kompanııa qatysýda. MiningWorld Central Asia, Kazcomak jáne KazMet kórmeleriniń menedjeri Borıs Danılenkonyń aıtýynsha sharanyń bıylǵy ereksheligi kórme aýdany bıyl 80 paıyzǵa ulǵaıǵan. Turaqty qatysýshylar qataryna bıyl Avstralııa men Perýden kelgen kompanııalar qosylǵan. Kórmede ken jabdyǵy, rýdalar men mıneraldar óndirý jáne baıytý, kenishterdi qazbalaý, júkkótergish-tasymaldaý jabdyǵy, ónerkásiptik nysandar men jol qurylysy jáne metallýrgııa, metall óńdeý jáne mashına jasaý salalaryna qatysty jabdyqtarmen, ozyq tehnıkalarmen, úzdik jetistiktermen tanysýǵa bolady. Sondaı-aq kórme aıasynda «2010-2014 jyldarǵa QR ken-metallýrgııa salasyn damytý boıynsha baǵdarlama» taqyrybyna dóńgelek ústel men «Asyl jáne tústi metalldardy qaıta óńdeý protsessinde qoldanylatyn shyny jáne emaldi jabdyq», «Gravıtatsııalyq baıytý jáne qarqyndy tsıandaý salasyndaǵy tehnologııalar», «Ken-rýda ónerkásibinde tozýǵa tózimdi tabaqtar qoldaný» taqyryptarynda arnaýly semınarlar ótkiziledi.
3 kúnge sozylatyn kórmeni uıymdastyrýshylar Germanııa, Ulybrıtanııa, Qytaı men Túrkııadaǵy halyqaralyq seriktesterimen birlestikte qazaqstandyq Iteca kórmeler kompanııasy. Sharaǵa QR Indýstrııa jáne jańa tehnologııalar mınıstrliginiń Ónerkásiptik komıteti men Geologııa jáne jer qoınaýyn paıdalaný komıteti, Respýblıkalyq ken óndirý jáne ken-metallýrgııalyq kásiporyndar qaýymdastyǵy, «Taý-Ken Samuryq» ulttyq ken-rýda kompanııasy» AQ, Almaty qalasynyń Ákimshiligi jáne Qazaqstan Respýblıkasyndaǵy Reseı Federatsııasynyń Saýda ókildigi resmı qoldaý kórsetken.
