Almatyda taý bókteriniń bir bóligi opyrylyp tústi
ALMATY. QazAqparat - Almatynyń taýly aýdanynda kóshkin boldy, dep habarlaıdy QazAqparat tilshisi.
Medeý aýdanyndaǵy Kereı-Jánibek handar kóshesiniń boıynda, «Taý-kúni» oqý-saýyqtyrý kesheniniń aýmaǵynda topyraq kóshkini júrdi. 7200 tekshe metr tolpyraq pen taý jynysy ózen arnasyn bógemeı, Kishi Almaty kanalyna tústi. Oqys oqıǵadan eshkim zardap shekpedi.
«Kóshkin 14-15 sáýirde jaýaǵan jańbyrdyń saldarynan boldy. «Qazselqorǵaý» RMQK málimetinshe, kóshkin qaýpi áli de saqtalady. Keshen aýmaǵynda ornalasqan sport zal, basseın jáne ǵımarattar qıraýy múmkin», - dep habarlaıdy qalalyq TJD.
Almaty qalalyq Tótenshe jaǵdaılar departamentiniń qyzmetkerleri qaıta kóshkin bolýy yqtımal ýchaskelerdi anyqtady. Sol aýmaqtyń aınalasy jolaq lentamen qorshaldy. Sondaı-aq, mekeme ıesine qaýipti aımaqqa adamdardy jibermeýge jáne ǵımarattarǵa kirýge shekteý qoıý týraly habarlama jiberildi.
Jalpy Almaty aýmaǵynda 41 qaýipti ýchaske bar. Ótken jyly Almaty qalasynyń Tótenshe jaǵdaılar departamentine, qaladaǵy qaýipti aýdandardy qujattandyrý úshin bıýdjetten 35 mıllıon teńge bólindi. Qazir sol jumystar júrgizilýde.
Bıylǵy naýryz aıynan bastap Medeý jáne Bostandyq aýdandarynda jalpy kólemi 7 220 tekshe metr 4 kóshkin tirkeldi: «ıÝbıleınyı» shaǵyn aýdanyndaǵy Sulýsaı tas jolynda (kólemi 15 tekshe metr); Kýrortnaıa kóshesi, 75 (kólemi 3 tekshe metr); Bostandyq aýdanyndaǵy MJumabaev kóshesi 21-úı (kólemi 2 tekshe metr); «Taý-kúni» oqý-saýyqtyrý kesheniniń aýmaǵynda (kólemi 7 200 tekshe metr).
Mamandardyń aıtýynsha, kóshkiniń basty sebebi – nóser jaýyn saldarynan topyraqtyń ylǵaldanýy, sý qubyrlary men septıkterdiń jarylýynan bolady.
