Almatyda taý bókterinde qýraǵan shóp pen aǵash órtenip jatyr

ALMATY. QazAqparat - Almatynyń Bostandyq aýdanynda qýraǵan shóp pen aǵash órtenip jatyr, dep habarlaıdy QazAqparat tilshisi.

Almaty qalalyq tótenshe jaǵdaılar departamentiniń málimetinshe, órt sóndirý brıgadasy qyzyl jalynnyń jaqyn mańda ornalasqan turǵyn úı sektoryna taralý qaýpiniń aldyn aldy

«18 qyrkúıek kúni túski saǵat 11:11mınýtta Almaty qalasy TJD tabıǵı órtterge qarsy jıyntyq jasaǵy Bostandyq aýdany, «Ermensaı» shaǵynaýdany, Araılym kóshesi, 2/12 úıdiń jannyda taý baýraıyndaǵy qurǵaq shóp pen aǵashtardyń janǵany týraly habarlamaǵa shyqty»,- dep habarlady vedomstvadan.

Órt sóndirý brıgadasy kelgen kezde taýdyń baýraıynda jalpy aýdany 1,5 Ga jerde qýraǵan shóp pen aǵash órtengeni anyqtaldy.

Órttiń úsh qabatty turǵyn úıge taralý qaýipi boldy.

Joǵary temperatýradan úsh qabatty úıdiń plastıkalyq terezeleri, saıdıngtan jasalǵan úı jabyndysy qyza bastaǵan.

Órtti sóndirýge 57 adam men 14 birlik tehnıka jumyldyryldy.

Qabyldanǵan sharalardyń arqasynda órt sóndirildi.

Ottyń jeke turǵyn úı sektoryna taralý qaýpi tolyǵymen joıyldy.

Qaza bolǵandar men zardap shekkender joq.