Almatyda taý baýraıyndaǵy qurǵaq shópten tutanǵan órt tikushaqtyń kúshimen sóndirildi
ALMATY. QazAqparat – Almaty órt sóndirýshileri Qımasar shatqaly baýraıynda órtengen qurǵaq shópti tikushaqtyń kómegimen sóndirdi, dep habarlaıdy QazAqparat tilshisi.
Almaty TJD baspasóz qyzmetiniń málimetinshe, 9 tamyzda tańǵy saǵat 5:49-da Medeý aýdanyndaǵy Qımasar shatqaly baýraıynda qurǵaq shóp janǵany týraly habarlama kelip túsken.
«Oqıǵa bolǵan jerge TJD tabıǵı órtti sóndirý boıynsha birlesken arnaıy quramy - 36 adam, 9 tehnıka, sondaı-aq Іle Alataýy MUTP qyzmetkerleri dereý jiberildi. 500 sharshy metrlik alańda qurǵaq shóp pen daýyl qulatqan aǵashtar órtke oranyp jatqan. Betkeıdiń tik bolýy órt sóndirý tehnıkasyn alyp ótýge kedergi keltirgen. Órt sóndirýshiler jaıaý kóterilgen.
Órtti sóndirý úshin Ermak aspaly órt sóndirgishi, shantsty quraldar (shartyldaqtar, kúrekter) qoldanyldy. Órt tutanǵan aımaqtaǵy jer jyrtylyp, nátıjesinde órt 07:39-da aýyzdyqtaldy. Qurǵaq shópti sóndirýge QR TJM Mı-171 tikushaǵy jumyldyrylyp, 13:41-de tolyqtaı sóndirildi», - dep habarlady TJD-dan.
Órt sóndirýshiler túske deıin Medeý aýdanyndaǵy Aqmeshit kóshesiniń boıyndaǵy 7 myń sharshy metr, Alataý aýdany Indýstrııaly aımaǵyndaǵy 1,5 gektar, Naýryzbaı aýdany Kókterek kóshesiniń boıyndaǵy 1000 sharshy metr aýmaqty qamtıtyn qurǵaq shópti de qatar sóndirgen.
Almaty qalalyq TJD taýly-ormandy jerlerde órt qaýpiniń joǵary bolýyna baılanysty qala turǵyndary men qonaqtarynan ashyq otty paıdalanýdan, ot jaǵýdan, temeki shegýden jáne qurǵaq shóp pen orylǵan shópti jaǵýdan bas tartýdy suraıdy.
Eske salaıyq, QR Ákimshilik kodeksi 367-babynyń 3-bóligine sáıkes, erekshe qorǵalatyn tabıǵı aýmaqtarda órt qaýipsizdigi talaptaryn buzǵan jeke tulǵalarǵa 100 AEK - 291 myń 700 teńge mólsherinde aıyppul salynady. Kináli tulǵalar qylmystyq jaýapkershilikke tartylady.
Avtory: Elaman Turysbekov
