Almatyda tasymaldaýshy kompanııalar «Sergek» aıyppulyn tólemeıdi
ALMATY. QazAqparat – Almatyda «Sergektiń» jol tasymaldaýshylaryna salǵan aıyppuly zańsyz dep tanyldy. Bul týraly qalalyq Kásipkerler palatasynyń baspasóz qyzmeti málimdedi, dep habarlaıdy QazAqparat tilshisi.
Kásipkerler palatasyna osy taqyrypta tasymaldaýshy kompanııalardan ujymdyq shaǵym túsken.
2019 jyldyń qyrkúıek aıynan bastap avtotasymaldaýshylardyń atyna qoǵamdyq kólikke arnalǵan joldarda júrgeni úshin aıyppul túse bastaǵan.
Tasymaldaýshylar turaqty jáne turaqsyz tasymaldaý jumystarymen aınalysady. Turaqty tasymaldaýshylar – qoǵamdyq kólikter. Turaqsyz tasymaldaýshylar belgili bir marshrýtsyz jolaýshy tasymaldaıtyn avtobýstar bolyp tabylady. Aıyppuldar turaqsyz tasymaldaýshy kompanııalarǵa túsken. Zańǵa sáıkes olarǵa avtobýs jolaǵyn paıdalanýǵa tyıym salyndy degen naqty bap joq.
«Osy máselemen barlyǵy 7 kásipker júgindi. Olarǵa 160 myń teńgeden astam somaǵa 21 uıǵarym joldanǵan. Tasymaldaýshylar usynylǵan talaptarmen kelispedi. Alaıda olar esepshottaryn jabýdan qorqyp aıyppul tóleýge májbúr bolǵan. Kásipkerler ýákiletti memlekettik organdarǵa kómek surap júgingen, biraq esh nátıje bolmaǵan. Sonymen qatar, kásipkerler ákimshilik polıtsııa bólimine suraý jibergen, jiberilgen mekemeden jaýap alyndy. Bul hatta «tyıym salynǵan kólik quraldaryna arnalǵan joldarda ... qozǵalys bolmaıdy jáne osy jolda basqa kólik quraldarynyń toqtaýyna bolmaıdy» jáne «qoǵamdyq jolda júrýge ruqsat berý zańda kózdelmegen» degen jaýap keldi. Turaqsyz tasymaldaýshy avtobýstyń nómirleri bazalarǵa engizilmegen jáne aıyppuldar joıylǵan joq», - dedi kásipkerler palatasynyń baspasóz qyzmetinen.
Máseleni zerdeleı otyryp, Palata sarapshylary Almaty qalasy Ákimshilik polıtsııa basqarmasynan túsken nusqamalardy zańsyz, negizsiz, bızneske ákimshilik qysym kórsetetin jáne ákimshilik tosqaýyl dep baǵalady.
Palata Almaty qalasynyń prokýratýrasyna ýákiletti memlekettik organdardyń is-áreketterin jan-jaqty zerdeleý boıynsha jumys júrgizý jáne jaýapty tulǵalarǵa qatysty sharalar qabyldaý týraly ótinishpen hat joldady.
Nátıjesinde QR ІІM aralasýymen avtotasymaldaýshylarǵa qatysty aıyppuldar joıylyp, olarǵa qoǵamdyq kólik úshin joldardy paıdalanýǵa ruqsat etiletin boldy.
