Almatyda tártip saqshysynyń kıimin kıgen jalǵan polıtseı ustaldy

Jol boıymen ótip bara jatqan shynaıy jol polıtseıleri beıtanys jol saqshysynyń dóreki áreketterin baıqap, ony teksermek bolady. Alaıda, jalǵan kıim úlgisin kıgen ofıtser jol saqshylaryn kóre salysymen qasha jónelgen.

«Bizdiń bólimsheniń ınspektorlary kúdik týdyrǵan bul azamatty tez arada quryqtap, onyń jalǵan polıtseı ekendigine kóz jetkizgen. Dálirek aıtsaq, onyń kıim úlgisinde eshqandaı sáıkestik belgileri túgili pogony da bolmaǵan. Tek qana qolyna ustaǵan jol saqshysynyń qyzyl taıaǵy men sary tústi kúrteshesine qarap, ony jol polıtseıine uqsaıtyndyǵyn ańǵarýǵa bolatyn edi. Osylaısha jalǵan jol saqshysy arly-berli aǵylǵan kólikterdi toqtatyp, tekseris júrgizbekshi bolǵan. Biraq ta naǵyz qyraǵy jol saqshylary muny der kezinde baıqap, onyń jolyna tosqaýyl koıa bildi»,-dedi Almaty qalasy ІІD Jol polıtsııasy basqarmasynyń bastyǵy, polıtsııa polkovnıgi Arman Sarbasov.

Onyń aıtýynsha, ustalǵan 20 jastaǵy azamat elimizdiń joǵarǵy oqý oryndarynyń biriniń stýdenti bolyp shyqqan. «Ol mundaı zań buzýshylyqqa óziniń dosyn qaljyńdap qorqytpaq nıette barǵandyǵyn aıtyp aqtalýda. Al onyń tártip saqshylarynyń kıim úlgisin qaıdan alǵandyǵy aldaǵy ýaqytta ótkiziletin tekserýler nátıjesinde anyqtalatyn bolady. Qazirgi ýaqytta, oqıǵanyń aq-qarasyn anyqtaý úshin quryqtalǵan azamat Bostandyq aýdandyq ІІB-ne jetkizildi. Tergeý amaldary aıaqtalǵannan keıin ol mindetti túrde qatań jaýapkershilikke tartylatyn bolady»,-dep málimdedi A.Sarbasov.