Almatyda tarıhshy Dına Dýlatovanyń 80 jyldyǵyna oraı halyqaralyq ǵylymı-teorııalyq konferentsııa ótedi
ALMATY. 30 naýryz. QazAqparat /Ádilet Musahaev/ - Aǵymdaǵy jyldyń 31-naýryzy men 1-sáýir aralyǵynda ál-Farabı atyndaǵy QazUÝ-dyń tarıh fakýlteti kórnekti qazaqstandyq tarıhshy, ǵylymdy uıymdastyrýshy professor Dına Isabaıqyzy Dýlatovanyń 80 jyldyǵyna oraı
«Birinshi Dýlatova oqýlary. Búgingi Qazaqstan, Reseı jáne Ortalyq Azııa elderindegi tarıh ǵylymy jáne tarıhty oqytý» atty halyqaralyq ǵylymı-teorııalyq konferentsııa ótkizedi.
Keńes ókimetinen keıingi 20 jyl táýelsizdik ishinde Qazaqstan, Reseı jáne Ortalyq Azııa respýblıkalarynyń tek saıası-áleýmettik, ekonomıkalyq damýynyń qortyndysyn ǵana emes, eń bastysy osy memleketterdiń ortaq tarıhı ótkenin, ásirese qoǵamdyq tarıhı jadynyń ereksheligin zertteýge múmkindik beredi. Búgin tarıhymyzdyń ortaq oqıǵalary qaıta qaralyp, olarǵa ár eldiń tarıhshylary ózindik baǵa berip otyr. Kóp jaǵdaıda jaqyn arada bolyp ótken oqıǵalarǵa baǵa berý úshin kelisimge kelýdiń ornyna qaıshylyq týyp jatady: tarıhqa naqty ártúrli kóz-qarastardyń qalyptasýy ortaq tarıhy bar adamdar men memleketterdiń arasyn alshaqtata túsedi. Sondyqtan da, orta ǵasyrlardan HH ǵasyrdyń aıaǵyna deıin jalpy tarıhtyń ár kezeńindegi oqıǵalarǵa baǵa berý (Túrki qaǵanaty, Mońǵol ımperııasy, Reseı ımperııasy men KSRO) talqylaýdy qajet etedi.
Konferentsııanyń maqsaty ǵylymı ádis pen ótkenimizdiń ortaq tarıhyna baǵa berýmen, tarıhı ǵylymı bilimniń qordalanýymen baılanysty tabıǵatynan pánaralyq bolyp keletin máselelerdi obektıvti túrde zertteý úshin tarıhshylar men basqa qoǵamdyq ǵylymdarmen aınalysatyndardyń kúshin biriktirý bolyp tabylady.
Sharaǵa AQSh-tan Vıskonııa (Wisconsin-Madison) ýnıversıtetiniń professory Vırdjınııa Martın, Reseı ǴA Sibir bólimshesiniń Arheologııa jáne etnografııa ınstıtýtynyń Omby fılıalynyń etnografııa sektorynyń meńgerýshisi t.ǵ.k. A.G. Seleznev, Reseı qoǵamdyq zertteýshiler qaýymdastyǵynyń prezıdenti (AIRO-HHІ), reseılik ǵalymdart.ǵ.k.G.A. Bordıýgov, t.ǵ.d., professor N.E. Bekmahanova, t.ǵ.d., professor N.B. Narbaev, t.ǵ.d., D.A. Amanjolova jáne elimizdiń Almaty, Astana, Qaraǵandy, Aqtóbe, Oral t.b. qalalarynyń joǵary oqý oryndary men ǵylymı mekemeleriniń ókilderi qatysady.
