Almatyda tarıhı «Myń tamshy» sýburqaǵy qalpyna keltirildi

ALMATY. QazAqparat - Almatyda Qazaq-Brıtan tehnıkalyq ýnıversıtetiniń janynda ornalasqan «Soltústik» (Severnyı) skverine rekonstrýktsııa jasaldy, dep habarlaıdy QazAqparat tilshisi.

Almaty ákimdiginiń málimetinshe, rekonstrýktsııalaý jumystaryn Almaty qalasynyń ekologııa jáne qorshaǵan orta basqarmasy júrgizdi.

Skver aýmaǵynda beton plıtkalary tóseldi, otandyq óndiristiń shoıyn tirekteri men shamdary ornatyldy, sýarý júıesi qalpyna keltirildi, qosymsha rezervýar ornatyldy. Kógaldandyrý jumystary barysynda qaraǵaı, kashtan, sándik arborvıta, raýshan jáne basqa da gúlder otyrǵyzyldy.

Rekonstrýktsııalaý qalanyń tarıhı-mádenı murasynyń, onyń ishinde «Myń tamshy» sýburqaǵynyń beınesin saqtaýdy eskere otyryp júrgizildi.
«Jóndeý-qalpyna keltirý jumystary barysynda barlyq qubyrlar, saptamalar men armatýralar uzaq merzimdi paıdalaný nátıjesinde isten shyqqandyǵy anyqtaldy. Korrozııa nátıjesinde qubyrlarda aǵyn paıda boldy, tuzdardyń tunýy oryn aldy, bul sý sańylaýlarynyń bitelýine ákeldi. Osyǵan baılanysty qubyr júıesi men sorǵy qondyrǵysy, sýburqaqtyń jumys isteýin qamtamasyz etetin syrtqy jeliler tolyǵymen aýystyryldy. Sýburqaqtyń granıt jabyny da qalpyna keltirilip, jaryqtar men oıyqtar joıyldy», - dep habarlady qalalyq ákimdik.

Aıta keteıik, kelisimshartqa sáıkes merdiger uıym eki jylǵa deıingi merzimge júrgizilgen jumystarǵa kepildik mindetteme alady.