Almatyda tárbıe úderisiniń jańashyldyǵy týraly ádistemelik semınar ótedi
ALMATY. 28 mamyr. QazAqparat - Almatyda 29 mamyrda «Qazaqstannyń qoǵamdyq-áleýmettik damý jaǵdaıynda Abaı atyndaǵy Qazaq ulttyq pedagogıkalyq ýnıversıtetindegi tárbıe úderisiniń jańashyldyǵy» dep atalatyn ádistemelik semınar ótedi.
Oǵan Almatydaǵy jetekshi joǵary oqý oryndarynyń ǵalym-ustazdary qatysady. Semınarda tárbıe úderisiniń jańashyl baǵyttary, olardy júzege asyrýdyń tıimdi joldary, qazirgi qoǵam talaptaryna saı áleýmettik belsendi, tolyq kemeldengen, zııatkerlik áleýeti joǵary tulǵany qalyptastyrýdyń alǵysharttary, joǵary oqý ornyndaǵy tárbıe jumysynyń basymdylyqtary, jastar tárbıesindegi qoǵamnyń róli, zııatker ultty qalyptastyrýdyń negizi sııaqty máseleler qaralmaq.
«Jastar tárbıesi qoǵam úshin árqashan da ózekti. Óskeleń urpaqty tárbıeleý mindetin memlekettiń ulttyq qaýipsizdigin qamtamasyz etýdegi mańyzdy isterdiń biri retinde uǵyný qajet. Tanym men shyǵarmashylyqqa úıretý - qazirgi bilim berýdiń negizgi baǵyty. Onyń tabysy jeke adamnyń ósý dárejesine baılanysty - azamattyq ustanym, quqyqtyq saýattylyq, jan-jaqty jáne kóshbasshylyq qasıetterdi damytý, mamandyq pen ónerde ózin-ózi tabý sııaqty qasıetter», - deıdi ýnıversıtettiń baspa ortalyǵynyń qyzmetkeri Álııa Asmaǵulova. Onyń aıtýynsha, pedagogıkalyq joǵary oqý orny rektorynyń tárbıe jumysy, jastar saıasaty jáne memlekettik tildi damytý basqarmasy bul sharany arnaıy uıymdastyryp otyr. Óıtkeni kásibı bilim berý, stýdentterdi damytý men tárbıeleýge qatysty. Stýdent-jastar óz zamanynyń eń damyǵan bóligi retinde erteń-aq qoǵamnyń aldyńǵy qatarly kúshi bolady. Maqsat - jańa áleýmettik-ekonomıkalyq jaǵdaılarda jumys isteı alatyn mamandardy joǵary oqý ornynda tárbıeleý jáne damý zańdylyqtaryn aıqyn júrgizý».
