Almatyda tapanshamen aspanǵa birneshe ret oq atqan er adam ustaldy
ALMATY.QazAqparat- Almatydaǵy 28 gvardııalyq- panfılovshylar atyndaǵy saıabaqta belgisiz er adam tapanshamen aspanǵa oq atty. Bul týraly Almaty PD baspasóz qyzmetinen málim etti,dep habarlaıdy QazAqparat tilshisi.
«Medeý aýdanynyń polıtsııa basqarmasynyń tergeý bólimi buzaqylyq jáne qarýdy zańsyz alý, saqtaý jáne alyp júrý faktileri boıynsha qylmystyq is qozǵady. Búgin tańerteń 28 gvardııalyq-panfılovshylar atyndaǵy saıabaqta er adam tapanshadan aýaǵa birneshe ret oq atqan. Ol óziniń osyndaı is-áreketi arqyly qoǵamdyq tártipti buzdy.Sondaı-aq, aınalasyndaǵylarǵa qaýip týdyrdy. Kúdikti B ustaldy. Ol 1994 jyly týǵan. Tárkilengen qarýǵa sot-ballıstıkalyq saraptama taǵaıyndaldy. Onyń kimge tıesili jáne kimniń atyna tirkelgeni anyqtalady. Sondaı-aq basqa qylmysqa qatysy bar-joǵy tekseriletin bolady. QR QK 287-bap, 3-bóligine sáıkes sotqa deıingi tergeý júrgiziledi»,- deıdi Almaty qalalyq PD Medeý aýdandyq polıtsııa basqarmasynyń bastyǵy Bolat Totybaev.
Almaty aýdanaralyq mamandandyrylǵan tergeý soty kúdiktige qatysty 2 aı merzimge qamaýǵa alý túrindegi bultartpaý sharasyn sanktsııalady. Sotqa deıingi tergeý organy kúdiktiniń Almaty qalasynyń aýmaǵynda basqa da qylmystyq quqyq buzýshylyqtarǵa qatysy bar-joǵyn tekseredi.
