Almatyda tapanshadan oq atqan er adam ustaldy
ALMATY. QazAqparat – Almatyda «Almaty bizdiki» dep aıǵaılap tapanshadan oq atqan adam ustaldy, dep habarlaıdy QazAqparat tilshisi.
Belgisiz bireýlerdiń aspanǵa oq atyp, aıǵaılaǵandaǵy vıdeosy áleýmettik jelige tarady. Bul kópshiliktiń narazylyǵyn týdyrdy.
«Bostandyq aýdandyq polıtsııa basqarmasynyń qyzmetkerleri jedel túrde Rozybakıev kóshesiniń boıynda salynyp jatqan nysandardyń biriniń aýmaǵynda turǵan Qyzylorda oblysynyń turǵyny, 1996 jyly týǵan M. atty azamatty anyqtap, ustady.
«M. myrzanyń osy mekemede santehnık bolyp jumys isteıtindigi belgili boldy. Onyń qolynda travmatıkalyq tapansha bolǵan, ol kúdiktiniń turǵylyqty jerinen tabylyp, tárkilendi. Kúdiktiniń aıtýynsha, bunyń sebebi - áleýmettik jelilerde tanymal bolýǵa degen umtylys. Bul fakt sotqa deıingi tergeýdiń biryńǵaı tiziliminde QR QK-niń 287 baby boıynsha tirkeldi. Tergeý júrip jatyr», - dedi, Bostandyq aýdandyq polıtsııa basqarmasynyń bastyǵy, polıtsııa podpolkovnıgi Dýman Aýhadıev.
Óz kezeginde, ustalǵan jigit kópshilikten keshirim surady.
«Men óz kinámdi moıyndaımyn, meniń is-áreketim zańǵa qaıshy ekenin bilmedim, óz kinámdi moıyndaı otyryp, men qazaqstandyqtardan keshirim suraǵym keledi. Meni keshirińder»,– dedi ol.
Buǵan deıin tapanshadan oq atqan adamdy polıtsııanyń izdestirip jatqanyn jazǵan bolatynbyz.
