Almatyda Tańjaryq oqýlary jáne stýdentter aıtysy ótedi
ASTANA. QazAqparat - Ústimizdegi jyldyń 28 naýryz kúni Qazaq memlekettik Qyzdar pedagogıkalyq ýnıversıtetiniń mereıli 70 jyldyq merekesine oraı, Almaty qalasy JOO stýdentteri arasynda «Tanı ma eken myna jurt - Tańjaryqty» degen atpen tuńǵysh ret Tańjaryq oqýlary jáne stýdentter arasynda aıtys ótkiziledi.
Bul týraly «Qyzdar ýnıversıteti» medıaortalyǵynan habarlady.
Atalmysh sharanyń basty maqsaty - Qazaq ádebıettiniń beldi ókili, ult qaıratkeri, aqyn-aǵartýshy Tańjaryq Joldyulynyń óleńderin, shyǵarmashylyǵy men ónegeli ómirin dáripteý, jas urpaqty qazaq ádebıeti men tarıhynyń aqtańdaqtaryn ashýǵa, zerdeleýge shabyttandyrý.
Sharaǵa qatysýshylar eki kezeń boıynsha synǵa túsedi. Birinshi «...Artynda aqyn ólse belgi bolyp, áńgime, óleń, taqpaq, jyr qalady» dep atalatyn kezeńde jeke jáne komandalyq (3 adam) óner baıqaýy ótedi. Munda qatysýshylar aqyn shyǵarmashylyǵy negizinde shaǵyn teatrlandyrylǵan qoıylym kórsetip, aqynnyń óleńderin (keminde 3-5) mánerlep, jatqa oqýdan saıysqa tússe, ekinshi kezeńde aqyn ómiri men shyǵarmashylyǵy jaıynda qoıylǵan suraqtarǵa jaýap berip, «Shyn júırik órge salsa órshelener» degen taqyryp aıasynda aqynnyń shyǵarmashylyǵyn, aıtyskerlik talanty men qaıratkerlik tulǵasyn dáripteı otyra aıtysqa túsedi. Aıtyskerler bul synda Qyzdar ýnıversıtetiniń 70 jyldaǵy jetistikterin de tilge tıek etedi.
«Tańjaryq oqýlary» aıasynda tuńǵysh ret uıymdastyrylyp otyrǵan ıgi bastama Qazaq memlekettik Qyzdar pedagogıkalyq ýnıversıtetiniń mereıli 70 jyldyǵy aıasynda ótkeli otyrǵandyqtan, qatysýshylarǵa qomaqty júlde tigiledi.
Keshtiń qurmetti qonaqtary: Qazaqstan Jazýshylar Odaǵynyń músheleri, belgili ádebıettanýshy, tańjaryqtanýshy ǵalymdar, buqaralyq aqparat quraldarynyń ókilderi.
2014 jyldyń 27 naýryz kúni irikteý kezeńi bastalady. Baıqaýǵa qatysýǵa nıetti úmitkerler 25 naýryzǵa ózi týraly qysqasha málimetter kórsetip tirkelýi qajet.
