Almatyda «Tańjaryq oqýlary» uıymdastyrylady
Tańjaryq - qazaq jazba poezııasynyń kórkemdik deńgeıin kóterip qana qoımaı, aıtys óneriniń de tarıhı betterin ashqan adýyndy aıtysker. Abaıdan bastap zamandasy bolǵan Alash arystarynyń shyǵarmashylyǵyn jete tanyp meńgergen. Alash ıdeıasyn Qytaıdaǵy qazaqtarǵa túrli joldarmen nasıhattaǵan. Quljada alǵash ret qazaq teatryn ashyp Beıimbettiń «Shuǵa» pesasyn sahnalap, basty róldi somdaǵan. 1935 jyly qytaı qazaqtarynyń tuńǵysh baspasózi - «Іle ózenin» shyǵarýdy uıymdastyrǵan ári bas redatory bolǵan. Kóptegen mektepterdiń ashylýyna yqpal etken. Kóp óleńi abaqtyda jazylǵan. Túrme ádebıetin qalyptastyryp, sol kezdegi qoǵamdyq shyndyqty óleń, tolǵaý, ánderi arqyly búkpesiz pash etken.
Aqynnyń kóptegen óleń, arnaý, tolǵaýlary, qısa-dastandary men áıgili aıtystary bar. Shyǵarmalarynda XX ǵasyrdyń alǵashqy jartysyndaǵy qytaıdaǵy qazaqtardyń tarıhı taǵdyry, almaǵaıyp saıası ahýal, kúrdeli áleýmettik máseleler aına-qatesiz ashyp kórsetiledi.
Aqynnyń 112 jyldyǵyna oraı 17-18-naýryzda Almatyda qalalyq «Tańjaryq oqýlary» ótedi. Oǵan qaladaǵy 8 oqý ornynan 40-tan astam stýdent, magıstrant qatyspaq. Igi sharany Qazaq memlekettik qyzdar ýnıversıteti uıymdastyryp otyr. Basty maqsaty: Alash urandy ádebıettiń beldi ókili, ult qaıratkeri, aqyn-aǵartýshy Tańjaryq Joldyulynyń óleńderin, ónegeli ómirin dáripteý, jas urpaqty qazaq ádebıeti men tarıhynyń aqtańdaqtaryn ashýǵa, zerdeleýge shabyttandyrý. Qatysýshylar Tańjaryq óleńderin jatqa oqyp, aqyn ómiri men shyǵarmashylyǵy týraly suraqtarǵa jaýap berip, teatrlandyrylǵan qoıylymdar jasaıdy. Oǵan Tańjaryqtanýshy ǵalymdar, zertteýshiler, belgili aıtysker aqyndar, tanymal ánshiler qatyspaq. Іs-shara aıasynda Tańjaryq Joldyulynyń aıtystarynan úzindi oryndalyp, ánderi shyrqalady.