Almatyda tanymal sportshylar men óner juldyzdary «Men elimdi súıemin» aktsııasyna qoldaý kórsetti (FOTO, VIDEO)
ALMATY. QazAqparat - Búgin Almaty mańyndaǵy Medeý sport kesheninde respýblıkalyq «Men elimdi súıemin» patrıottyq aktsııasy aıasynda saltanatty shara ótti. Oǵan elimizge belgili sportshylary, tanymal óner juldyzdary jáne myńnan astam stýdentter qatysty.
Aktsııa barysynda muz aıdynyna shyqqan jastar flesh-mob uıymdastyrdy. QR Táýelsizdiginiń 25 jyldyǵyna oraı tizilip turyp, júrektiń beınesin saldy. Sóıtip, onyń ortasyna «25» sanyn kórsetti.
Óz sózinde bokstan Sıdneı Olımpıadasynyń chempıony Ermahan Ybraıymov otandy súıý - naǵyz patrıottyq sezim ekendigin, sondyqtan patrıot bolý kerektigin aıtty.
«Búgin qazaqtyń elimizge belgili nar tulǵaly azamattary jáne stýdent jastary Medeýge kelip, ózderiniń otanymyzǵa degen súıispenshiligin bildirip jatyr. Bul jerde ásirese jastardyń kóptep jınalǵany bizdi erekshe qýantady. Óıtkeni, otandy súıý, Qazaqstandy súıý - bul naǵyz patrıottyq sezim! Sondyqtan, patrıot bolyńyzdar! Alǵa Qazaqstan!», - dedi Ermahan Ybraıymov.
Óz kezeginde ánshi Mádına Sádýaqasova jastardy el damýyna úles qosýǵa shaqyrdy.
«Elimizdiń órkendeýine ózimizdiń úlesimizdi qosqymyz keledi. Jáne de oǵan bizdiń múmkindigimiz de kúshimiz de jetedi. Eń bastysy, Qazaqstandyqtar beıbit elde, máz meıram ǵumyr keshýde», - dedi ol.
Sonymen qatar, stýdent jastar da ózderiniń otanǵa degen lebizderin sezimin bildirip jatty.
«Qanshama jastar myna jerde qoldaryna kóp kók baıraq pen sharlar ustap, otandy sheksiz súıetinderin bildirip jatyr. Barlyǵymyz jaqsy kóremiz elimizdi. Alaıda, ony osylaı kórsete berý, pash etý - úlken mańyzǵa ıe», - dedi stýdent Uljan Ybraıymova. 
