Almatyda tańǵy 5-te páter tonaǵan ury ustaldy
ALMATY. QazAqparat - Almaty polıtsııasy tún ishinde páter tonaǵan uryny ustaldy, dep habarlaıdy QazAqparat tilshisi.
Qalalyq Polıtsııa departamenti habarlaǵandaı, 40 jastaǵy er adam tańǵy saǵat 5-ter shamasynda M.Maqataev kóshesinde ornalasqan úılerdegi páterdiń birine urlyqqa túsken.
Bul ýaqytta úı ıeleri uıyqtap jatqan.
«Tańǵy 5-te páter ıeleri kómekke shaqyrǵan aıǵaıdy estigen. Biraq, alystan qumyǵyp estilgen daýysqa mán bermeı uıyqtaı bergen. Bir ýaqytta balalar bólmesine betperde kıgen er adam kirip kelgen. Áıeldiń sómkesin ala sap qasha jónelgen. Qashqan boıy as úıdiń terezesinen kireberistiń shatyryna sekirip túsken. Sosyn shatyrdan asyqpaı túsip, betperdesin sheship ary qaraı alystap ketken», - dedi polıtsııanyń baspasóz qyzmetinen.
Birneshe mınýt ishinde jetken polıtsııa qyzmetkerleri aýlalardyń birinen kúdiktini baıqaǵan. Er adam áıeldiń sómkesin aqtaryp otyrǵan jerinen ustaldy.
Tintý kezinde odan betperde, pyshaq, áıel adamnyń sómkesi tabyldy.
Kúdikti Almaly aýdandyq PB-ǵa jetkizildi.
«Atalǵan derekke baılanysty QR QK 191-babynyń 2-bólimimen qylmystyq is qozǵaldy. Ustalǵan adamnyń kim ekendigi de anyqtaldy. Almaty oblysynyń týmasy buryn da osyǵan uqsas birneshe ret isti bolǵan. Sonymen qatar, páterde turatyn otaǵasynyń týysy tún ishinde bireýdiń júrgenin sezip bólmeden shyqqan kezde uryny kórgen. Ury oǵan pyshaǵyn kórsetip, qorqytqan. Sodan er adam ájethanaǵa tyǵylyp qalǵan. Ol ishten aıǵaılap týystaryn oıatpaq bolǵan», - dedi polıtseıler.
