Almatyda tańerteńnen beri izdestirilgen 9 jasar qyz bala aman tabyldy
ASTANA. QazAqparat - Eriktilerdiń kómeginiń arqasynda búgin tańerteń Almatyda joǵalyp ketken 9 jasar oqýshy qyz aman-esen tabyldy, – dep habarlaıdy Polisia.kz.
– Qyz trolleıbýstan tabyldy. Ol kúni boıy qoǵamdyq kólikte júrgen bolýy da múmkin. Biz basqa jaǵdaılardy mindetti túrde anyqtaımyz. Eń bastysy - balada bári jaqsy. Patrýldik polıtsııa qyzmetkerleri ony ata-anasyna tapsyrdy. Óz kezeginde, Almaty qalasynyń polıtsııasy qyzdy tabýǵa jan-jaqty kómek kórsetken qamqor azamattarǵa sheksiz alǵysyn bildiredi, - dedi Almaty qalasy PD JPQB ıývenaldy polıtsııanyń bastyǵy Janna Shonjanova.
Aıta keteıik, Almatyda búgin tańǵy saǵat 07:40-ta Seıfýllın dańǵyly boıyndaǵy úıden Almatynyń Túrksib aýdanynda ornalasqan mektepke shyǵyp ketken 9 jasar Aısha Tımýrdy izdeý jumysy júrgizildi. Oqýshy qyzdy izdeýge barlyq polıtsııa jasaqtary, Ulttyq ulan sarbazdary, eriktiler jáne qarapaıym adamdar jumyldyryldy.
Foto: polisia.kz
