Almatyda «Talents Go» bıznes-keıster baıqaýynyń aqtyq syny ótip jatyr
ALMATY. 1 qarasha. QazAqparat /Názıra Eleýhan/ - Búgin Almatyda QR Tuńǵysh Prezıdenti qorynda stýdentter arasyndaǵy «Talents Go» bıznes-keıster baıqaýynyń aqtyq týry ótip jatyr.
Aqtyq synǵa ótken 9 fınalıst búgin ózderiniń bıznes jobalaryn jetekshi kompanııa basshylarynan quralǵan ádil-qazylar aldynda qorǵap jatyr.
Esterińizge sala ketsek, atalmysh baıqaý bıylǵy jyldyń 15 qyrkúıeginde bastalǵan bolatyn. Aqtyq synǵa ótken qatysýshylar eki týrdan ótip, kompanııalardyń aktsııalaryn baǵalaý boıynsha saraptamalyq esep daıyndady, sonymen qatar, qarjy, marketıng pen ekonomıka, IQ jáne aǵylshyn tilinen keńeıtilgen synaqtamadan ótti. Baıqaýdyń birinshi - «Business» dep atalatyn bólimi bıznes oılaýdy damytýǵa baǵyttaldy, ol baıqaýda korporatıvtik qarjy, menedjment, marketıng jáne ekonomıka salalary boıynsha eń talantty degen stýdentter anyqtaldy.
Uıymdastyrýshylardyń aıtýynsha, bul Qazaqstannyń bıznes ortasyndaǵy kásibı toptyń bir bóligi bolǵysy keletinder úshin keremet múmkindik.
Baıqaýdyń júldegerleri jetekshi ult aralyq jáne otandyq kompanııalarda tájirıbeden ótýge múmkindik alady. Sonymen qatar, jeńimpazdarǵa iPad plansheti, 500 $ jáne 1000 $ kóleminde qarjylaı syıaqy beriletin bolady.
