Almatyda tal túbinen tabylǵan balanyń ákesi: Meni májbúrlep moıyndatty
ALMATY. QazAqparat - Almatyda tal túbinen basy jarylǵan kúıinde tabylǵan 4,5 jastaǵy balanyń ákesi Murat Asqaroǵlynyń isi boıynsha aldyn ala sot tyńdalymy ótti, dep habarlaıdy QazAqparat tilshisi.
Sottalýshy Murat Asqaroǵly BAQ ókilderine óziniń kináli emestigin aıtyp, ar-ujdanyna nuqsan keltirmeýdi ótindi.
«Ótinemin, meniń abyroıymdy qalpyna keltirýge kómektesińizder. Men balamdy urǵan joqpyn. Kerisinshe, olar meniń balamdy ýaıymdap, qaıǵyda júrgen kezimdi paıdalanyp olar (quqyq qorǵaýshylar - red.) maǵan belgisiz birdeme berdi. Úıden aldap alyp shyqty. Myna qujatqa qol qoı dedi. Men balamdy urmadym. Qandaı áke balasyn ura alady? Balam jol apaty boldy dedi. Men balamdy áli kórmedim. Ol meni saǵynyp júr. Eger men oǵan osylaı qol kótersem, ol men týraly surar ma edi? Men ol kezde jumysta boldym. Ony rastaıtyn adamdar da bar», - dedi Murat Asqaroǵly.
Eske sala keteıik, qaıǵyly oqıǵa 16 shilde kúni Odesskaıa men Brıanskaıa kósheleriniń qıylysynda boldy. Turǵyndar tal túbinen 4 jasar balany taýyp alǵan. Bala shala-jansar kúıinde shuǵyl aýrýhanaǵa jetkizilip, ota jasaldy. Almaty polıtsııasy jantúrshigerlik oqıǵaǵa kúdikti retinde balanyń ákesin ustady. Murat Asqarogly óziniń kinásin moıyndap, qazaqstandyqtardan keshirim surady. Er adam mastyqtan eseńgirep turǵanda balasynyń qyńqyl-syńqylyn kótere almaı, taspen samaıynan bir-aq urǵan.
Qalalyq mamandandyrylǵan qylmystyq sot Murat Asqaroǵlyn QR QK 24-babynyń 3-bólimi jáne 99-babynyń 2-bólimi boıynsha qamaýǵa alǵan bolatyn.
