Almatyda taksıster jolaýshylardy qaladan shyǵarýdyń ádisin oılap tapqan
ALMATY. QazAqparat - Almaty polıtsııasy jolaýshylardy karantın aımaǵynan zańsyz shyǵaryp júrgen taksı júrgizýshilerin anyqtady, dep habarlaıdy QazAqparat tilshisi.
Qalalyq PD baspasóz qyzmetiniń habarlaýynsha, mundaı zańbuzýshylyqpen Almaty jáne Almaty oblysynyń shekarasynda ornalasqan eki úıdiń turǵyndary aınalysqan.
Olar azamattardy qaladan oblysqa jáne keri tasymaldaý shemasyn jasaǵan.
«Taksı júrgizýshileriniń biri shartty túrde qaladan klıent alyp, ony Alataý aýdanyndaǵy Terekti yqshamaýdanynda ornalasqan jeke úıge alyp barady. Klıent odan ári jaıaý júrip, aýladan ótedi, sodan keıin jalpy qaqpadan Almaty oblysynyń Qarasaı aýdany, Kóksaı aýylynda ornalasqan taǵy bir jeke ǵımarattyń aýlasyna kiredi. Jolaýshyny qaqpanyń ar jaǵynda taǵy bir taksı júrgizýshisi kútip turady jáne ol klıentti dittegen jerine jetkizdi. Júrgizýshiler Talǵarǵa jetkizgeni úshin 8 myń teńge alǵan. Al eki kórshi bir adamdy bir baǵytqa ótkizgeni úshin 3 myń teńgeden alyp otyrǵan», – dedi Almaty qalalyq polıtsııa departamenti basshysynyń orynbasary Berik Ábilbekov.
Ótken túnde «tranzıttik bıznestiń» barlyq «oıynshylary» ustaldy. Olardyń árqaısysynyń áreketine zańǵa sáıkes shara qabyldanǵannan keıin quqyqtyq baǵa beriledi.
