Almatyda taksıst týrısti áýejaıdan qalaǵa deıin 33 myń teńgege aparǵan
ALMATY. QazAqparat - Almatylyq taksıst týrısti áýejaıdan qalaǵa deıin 33 myń teńgege aparǵan, dep habarlaıdy QazAqparat tilshisi.
Bul týraly qaladaǵy hostelderdiń biriniń ıesi Shákir Islambakıev áleýmettik jelide jazdy
Shákirdiń aıtýynsha, taksıster 2000 teńge dep kelisedi de, kelgen soń ár shaqyrymy 2000 teńge dep shyǵady eken.
Sheteldikter problema týdyrmas úshin tóleıtin kórinedi.
«Eger taksıster birden qymbat baǵany aıtsa túsiner edim. Bulaı aldaý shekten shyqqandyq qoı. Qonaq ketip qalǵan. Biraq, jaǵymsyz ásermen ketkeni ras», - dedi ol.
Onyń aıtýynsha, bul birinshi jaǵdaı emes.
«4 jyl boıy men osy týraly aıtyp kelemin. Birneshe ret tekserý uıymdastyryldy. Biraq, baıaǵy jartas sol jartas. Almatyda ýnıversıada bolǵan kezde taksısterdi áýejaıdan qýyp shyqty emes pe? Bárin jasaýǵa bolady tek oǵan ynta bolsa», - dedi Shákir.
Almaty áýejaıy atalǵan oqıǵaǵa qatysty túsinik berdi.
«Áýejaıǵa kelgen jeńil kólik júrgizýshilerine kirýge tyıym salýǵa quqyǵymyz joq. Sebebi bul qoǵamdyq terrıtorııa. Júrgizýshilerdiń turaq tólemi bolsa boldy, olar kire beredi. Al keı taksıster jolaýshylardyń mazasyn alsa, jolaýshylar aryzdanýǵa quqyly. Biraq kópshiligi aryz jazbaıdy. Sosyn másele quqyqtyq deńgeıde kóterilmeıdi»,- delingen Almaty áýejaıynyń resmı jaýabynda.
Olardyń aıtýynsha, áýejaıda arnaıy resmı taksı qyzmeti jumys jasaıdy.
