Almatyda taksılerdiń jumysy retteledi
ALMATY. Jeltoqsannyń 25-i. QazAqparat /Erbol Azanbek/ - Almatyda jyl basynan beri kólik quraldaryna qatysty 319 qylmys tirkelgen. Onyń 144-i ashylǵan.
Bul derekter búgin Almatyda qalalyq ІІD men taksoparkter basshylarynyń kezdesýi barysynda aıtyldy, dep habarlaıdy QazAqparat.
Otyrysta belgili bolǵandaı, jyl basynan beri júrgizýshilerge 30 shabýyl jasalǵan. Onyń 12-si ashylyp, 7 avtokólik ıesine qaıtarylǵan.
Kezdesý barysynda bul máselelermen qatar taksı tasymaldaryn jetildirý, kólikterdi birtúske keltirý máseleleri sóz boldy. Otyrys barysynda belgili bolǵandaı, budan bylaı qylmystyń aldyn-alý men ashýda taksoparkter men ІІD arasynda aqparattyq almasý jolǵa qoıylmaq. Bul rette birikken jumys toby qurylady. Bul jumys tobyna jol polıtsııasy, krımınaldyq polıtsııa, taksoparkterdiń ókilderi kiredi. Jol polıtsııasy óz kezeginde taksılerdiń tıimdi jumys isteýi úshin kólik turaqtaryna taksılerdi qoıýdy sheshýmen, al taksoparkterdiń dıspetcherlik qyzmeti taksı júrgizýshileriniń kómegimen qalada oryn alǵan túrli qylmystardy ІІD-ne berýdi uıymdastyrýmen aınalyspaq.
Qazirgi kezde Almatyda 402 kóligi bar 6 úlken taksopark jumys isteıdi.
