Almatyda taksı júrgizýshisin jaralaǵan jigit sottaldy
ALMATY. QazAqparat - Almatyda jolaqysyn tólegisi kelmeı taksı júrgizýshisin atqan jigit sottaldy, dep habarlaıdy QazAqparat tilshisi.
Qalalyq sottyń baspasóz qyzmeti habarlaǵandaı, qylmystyq isti Medeý aýdandyq sotynyń sýdıasy Farrýh Omarov qarady.
Іs materıaldaryna sáıkes, 36 jastaǵy er adam dosymen birge Seıfýllın kóshesinde taksı toqtatqan. Dittegen jerge jetken soń eki jolaýshy túsip kete bergen. Onymen qoımaı sońdarynan jolaqysyn talap etken taksı júrgizýshisine qarata travmatıkalyq tapanshadan oq atqan.
Kýágerlerdiń aıtýynsha, atylǵan oqtardyń biri kólik júrgizýshisiniń betine tıse, qalǵandary turaqta turǵan kólikterdiń terezesin syndyrǵan.
Kóshege júgirip shyqqan adamdardyń qarasy kóbeıgen soń 36 jastaǵy jigit sol jerden tura qashqan.
Keıin belgili bolǵandaı, taksı júrgizýshisiniń kóziniń asty tusyndaǵy bet súıegi, keńsirik qýysy jaralanǵan. Bul áreketi úshin kúdikti japa shekken jigitten keshirim surap, aıybyn ótegen.
Sýdıa Farrýh Omarov sottalýshyny QR QK 287-babynyń 2-bólimimen, 107-babynyń 1-bólimimen, 293-babynyń 3-bólimimen qarastyrylǵan qylmysta aıypty dep tanyp, túpkilikti túrde 3 jyl 9 aı 23 kúnge bas bostandyǵyn shekteý týraly sheshim shyǵardy.
Er adam sot zalynan eshqaıda ketpeý týraly qolhatpen bosatyldy.
