Almatyda taksı baǵasyn retteý úshin qandaı shara qoldanylýda

Almaty qalasynyń týrızm jónindegi keńesi aıasynda qalanyń Kásipkerler palatasy janynan jumys toby quryldy. Onyń quramyna Almaty qalasynyń kásipkerler palatasy, Avıatsııalyq kólik prokýratýrasy, Almaty qalasynyń týrızm basqarmasy, Almaty qalasynyń halyqaralyq áýejaıy, Almaty qalasynyń halyqaralyq áýejaıynyń jelilik polıtsııa bólimi, Túrksib aýdanynyń jergilikti polıtsııa qyzmeti, Almaty qalasynyń memlekettik kirister departamenti, Almaty qalasynyń polıtsııa departamenti, Qazaqstandyq týrıstik qaýymdastyqtyń, Almaty qadasynyń jeke sot oryndaýshylarynyń óńirlik palatasy jáne t.b. kirdi.

«Eki apta ishinde jumys toby taksıge tapsyrys berý qyzmetteri (AparuTaxi, Region, Yandex Taxi, Uber, Blue Sky Energy jáne t.b.) usynatyn taksılerdiń qunyn taldap, taksımen júrýdiń ortasha baǵasyn eseptedi. Almatyda jolaýshylardy tasymaldaý tarıfteri baratyn pýnktke deıingi qashyqtyq pen taksı klasyna baılanysty 1200-den bastap 12000 teńgege deıin ózgeredi. Eń joǵary baǵa - áýejaı termınalynan «Shymbulaq» taý shańǵysy kýrortyna deıingi taksıdiń premıým segmentinde kórsetiledi.
Aıtý kerek, bul turaqty baǵalar emes, tek jolaýshylarǵa usynylatyn baǵalar. Taksı quny aýa-raıy, suranys pen basqa da derekterge qatysty ózgerýi múmkin. Usynylǵan baǵalardy eskere kele, jolaýshylar baǵa saıasatyn túsine alady», - dep habarlady Almaty ákimdigi.
Týrısterge arnalǵan usynystardy ázirleýdiń maqsaty – taksı júrgizýshileriniń zańsyz áreketterin retteý bolyp tabylady. Sondaı-aq, atalǵan jumys toby qalalyq aımaqtardy jáne usynylatyn baǵalardy qosa alǵanda, resmı taksı operatorlarynyń qyzmetteriniń tarıfterin kórsete otyryp, aqparattyq stendter men býkletter ázirledi.Almaty ákimdigi, sondaı-aq, kedendik baqylaý aımaǵynda shetel azamattarynyń pasporttaryna aqparattyq qosymsha paraqtardy taratý kózdelgenin málimdedi.