Almatyda «Taǵylym» mádenı ıntellektýaldyq klýby quryldy
ALMATY. Jeltoqsannyń 22-si. QazAqparat /Erlik Erjanuly/ - Búgin Almatydaǵy Mádenı saıasat jáne ónertaný ınstıtýtynda «Taǵylym» mádenı ıntellektýaldyq klýbynyń alǵashqy otyrysy ótip jatyr,
dep habarlaıdy QazAqparat.
«Búgingi tańda dúnıejúzinde mádenıet salasynda úlken ózgerister bolyp jatyr. Qazaqstan sonyń ishinde jahandaný áleminiń jaǵdaıynda ómir súrýde. Osy jahandanýdyń jaqsy jaqtarymen qatar, keleńsiz jaqtary da bar. Onyń eń negizgi máselesi, buǵanasy qatpaǵan jas mádenıetterdiń jahandaný mádenıetiniń astynda qalý qaýpi. Bir úıdiń ishinde otyryp álemdegi ózgeristerdi qabyldaý kózqarasymyz ártúrli. Bir otbasy 4-5 mádenıettiń qabyldaýshysy bolyp otyr. Odan eshqaıda qashyp qutyla almaısyń. Úıde teledıdar, ınternet, gazet, elektrondyq kitap bar. Sondyqtan dástúrli mádenıetti jaı ǵana saqtaý emes, ony qalaı damytamyz degen máselelerdi saraptaý úshin búgin ınstıtýt janynan mádenı ıntellektýaldyq klýb quryp jatyrmyz. Onyń negizgi maqsaty dúnıejúzinde bolyp jatqan úrdisterdi qazaqtyń dástúrli mádenıetine sáıkestendirý», deıdi Mádenı saıasat jáne ónertaný ınstıtýtynyń dırektory Erlan Saırov. Onyń aıtýynsha, búgingi tańda árqaısymyz qazaqtyń dástúrli mádenıetin ıgeremiz dep aıta almaımyz. Osynyń ózi jahandaný mádenıetiniń kórinisi. Ony ulttyq dástúrge sáıkestendirý úshin kóptegen ǵylymı zertteý jumystarymen birge turaqty pikirsaıystar júrgizip otyrý kerek. Oǵan basqa mádenıettiń jetkizýshilerin shaqyryp, oılaryn bilip, sol arqyly ózimizdiń mádenı saıasatymyzdy jóndep otyrýymyz qajet. Sol sebepti aıyna eki ret ótetin «Taǵylym» klýbynyń bir otyrysy ulttyq mádenıet ókilderimen ótse, ekinshisine sheteldikter shaqyrylatyn bolady. Máselen, búgingi otyrysqa «Teledıdar jáne radıo» Eýrazııalyq akademııasy Prezıdıýmynvyń múshesi, qoǵam qaıratkeri, «Konservator» jýrnalynyń bas redaktory Rýstam Arıfjanov shaqyrylyp otyr. Al aldaǵy basqosýlarda Norvegııanyń jáne Germanııanyń ulttyq mura ınstıtýtynyń dırektorlary qatysady dep josparlanyp otyr.
