Almatyda taǵy eki baǵdardyń avtobýstary jańardy
ALMATY. QazAqparat - Almatyda qoǵamdyq kólikti reformalaý aıasynda eki baǵdardyń avtobýstary jańardy, dep habarlaıdy QazAqparat tilshisi.
Jumys sapary kezinde qala ákimi Baýyrjan Baıbek №65 baǵdardy jańartý úshin jeke tasymaldaýshy satyp alǵan jańa avtobýstardy kórdi.
«Avto Alma Trans» JShS tómen edendi syıymdylyǵy joǵary 20 avtobýs alǵan. Olardyń barlyǵy kondıtsıonerlermen jabdyqtalǵan jáne Eýro-5 ekologııalyq standartyna saı. Sondaı-aq barlyq baǵdardyń júrgizýshileri biryńǵaı jańa forma kıgen. Al №65 baǵdardaǵy avtobýstar 2017 jyly jańartylǵan edi. Olar endi Dýman men Qaraǵaıly eldi mekenderine qatynaıtyn №4 baǵdardy jańartýǵa jiberiledi.
Almaty ákimi avtobýs júrgizýshilerinen qansha jalaqy alatyndyqtary men jumys jaǵdaılary týraly surady. Avtopark júrgizýshileri ortasha eseppen 160 myń teńgeden 200 myńǵa deıin alatyndyqtaryn jetkizdi. 
«Qala qoǵamdyq kólik úshin edáýir kólemde sýbsıdııa bólýde, avtobýs parkteri jańarýda, biraq kóp nárse júrgizýshilerge baılanysty. Adam tasymaldaý úlken jaýapkershilikti qajet etedi. Tekke bos otyrmańdar, jumystan qashpańdar, biz senderge qoldaý bildiremiz», - dedi Baýyrjan Baıbek.
Aıta keterligi, Almatyda kólik reformasy aıasynda 2018 jyly qala baǵyttary boıynsha 500 jańa avtobýstar júre bastady. Bıyl da qalanyń avtobýs parkin jańartý jalǵasady. Budan ózge «Almatyelektrotrans» JShS qarjysy esebinen gazben júretin taǵy 200 jańa avtobýs alynady.
