Almatyda taǵy bir jezóksheler úıi jabyldy
ALMATY. QazAqparat - Almatyda sheteldik áıelder qyzmet etken jezóksheler úıi jabyldy, dep habarlaıdy QazAqparat tilshisi qalalyq Polıtsııa departamentiniń baspasóz qyzmetine silteme jasap.
Bul joly jynoınaq Alataý aýdanyndaǵy jer úılerdiń birinde bolǵan.
«Túngi 23.00 shamasynda «jumys ornynda» 19 kelinshek bar bolyp shyqty. Olardyń ekeýi Ózbekstan azamaty, ekeýi Qyrǵyz elinen kelgen bolyp shyqty. Jezóksheler ordasyn 47 jastaǵy Almaty oblysynyń týmasy basqaryp kelgen. Ol ákimshi bolyp qyzmet atqarǵan. Qazir oǵan qatysty QR QK 309-babynyń 1-bólimimen sotqa deıingi tergeý isi tirkeldi», - dedi qalalyq PD qylmystyq polıtsııa basqarmasynyń basshysy Esen Ysqaqov.
Aıta ketý kerek, qala basshylyǵyna kelgen Baqytjan Saǵyntaev 1 shildeden bastap polıtsııaǵa qalany jezókshelerden tazalaýdy buıyrǵan bolatyn.
Sodan beri quqyq qorǵaýshylar profılaktıkalyq shara ótkizip keledi.
Seıfýllın prospekti men «Almaty-1» temir jol stansasy mańyndaǵy jeńil júristi kásip etken tulǵalardy joıýǵa kirisken.
«9 kúnde 609 azamat ustaldy. Onyń 433-i aqsha úshin tánin saýdalap júrgen. 41 júrgizýshi ustaldy. 250 adam ákimshilik jazaǵa tartyldy. Jynystyq quldyqta bolǵan eki áıel bosatyldy», - dedi E.Ysqaqov.
