Almatyda taǵy bir jezóksheler ordasynyń qojalary zańǵa tartylady
ALMATY. 26 qyrkúıek. QazAqparat /Erbol Azanbek/ - Almatyda jezóksheler ordasyn uıymdastyrǵany úshin «Konsýl» qonaq úıiniń 30 jastaǵy ákimshisiniń ústinen qylmystyq is qozǵaldy, dep habarlaıdy qalalyq ІІD-niń baspasóz qyzmeti.
Eske sala keteıik, polıtsııa buǵan deıin birneshe ret atalǵan qonaq úıde qonaq úı bıznesimen qatar jezóksheliktiń de «órken jaıyp» jatqandyǵyn anyqtaǵan bolatyn. Alaıda túrli sebepterge baılanysty qylmystyq is qozǵalmaǵan edi. «Bul qonaq úıde jezókshelik qyzmet kórsetýshi qyzdar ákimshige qonaq úıge kirip, óz qyzmetin kórsetý úshin 5 myń teńge tólep kelgen. Bunymen qatar olar ár nómirdi paıdalanǵany úshin saǵatyna 6 myń teńgege tólep otyrǵan. Bizdiń aqparatymyz boıynsha bul qonaq úıde kúnine 60-qa jýyq jezókshe «qyzmet kórsetken»,- deıdi ІІD-niń uıymdasqan qylmyspen kúres basqarmasy adam trafıgine qarsy kúres bóliminiń bastyǵy Tanat Nazanov. Onyń sózine qaraǵanda bul isten salyq tólenbeıtin zańsyz qyrýar qarjy túsip otyrǵan. Polıtsııanyń aqparaty boıynsha qonaq úıde jezóksheler bıznesimen bes adam aınalysqan. Olardyń kinási aldaǵy tergeý kezinde jeke-jeke anyqtalady.
Tanat Nazanovtyń aıtýynsha ótken kúnderi jezókshelikti óristetken «Maıak», «Pole chýdes», «Sagıshka» qonaq úıleriniń ıeleri men ákimshileri de quryqtalǵan. Olardyń ústinen birneshe qylmystyq is qozǵalǵan.
