Almatyda taǵy bir qarý-jaraq arsenaly tabyldy
ALMATY. QazAqparat - Almatyda taǵy bir qarý-jaraq arsenaly tabyldy, dep habarlaıdy QazAqparat tilshisi.
Qarý-jaraq jasyrylǵan oryndy Almaty qalasyndaǵy LA-155/18 Qylmystyq-atqarý júıesi departamenti qyzmetkerleri anyqtady.
«Almaty qalasynda jappaı tártipsizdikterge qatysqany úshin ustalǵan, qamaýǵa alynǵan azamattardan qarý-jaraq pen oq-dárilerdiń jasyrylǵan orny týraly aqparat alyndy. Ol qalanyń krımınaldyq polıtsııa qyzmetkerlerine tapsyryldy. Mekememizdiń jedel bóliminiń qyzmetkerleri KPB jáne Medeý aýdandyq polıtsııa basqarmasyndaǵy áriptesterdiń kómegimen Medeý traktine aparatyn orman beldeýinde jasyryn qoımanyń ornalasqan jeri anyqtaldy. Kúdiktiler qarý-jaraq pen oq-dárilerdi jasyryp qoıǵan. Aıta keterligi, kúdiktiler qarý-jaraq jasyrylǵan jerdi jyldam tabý úshin janyndaǵy aǵashqa iz qaldyrǵan. Negizi biz sol arqyly taptyq», – dedi Almaty qalasy boıynsha LA-155/18 QAJD mekemesi bastyǵynyń jedel jumys jónindegi orynbasary Azamat Amanjolov.
Tergeý-jedel tobymen revolver, sholaq myltyq, patrondar, granatalar, tútin granatalary tárkilendi.
Tabylǵan qarý-jaraq arsenaly sot-ballıstıkalyq saraptamaǵa jiberildi.
