Almatyda taǵy bir emhana vaktsınatsııa pasportyn satqany týraly aqparat tarady
ALMATY. QazAqparat - Almatyda taǵy bir emhana qyzmetkerleri vaktsınatsııa pasportyn satyp kelgeni týraly aqparat tarady, dep habarlaıdy QazAqparat tilshisi.
Áleýmettik jeli qoldanýshylarynyń jazýynsha, № 4 qalalyq emhanada medıtsına qyzmetkerleriniń zańsyz áreketteri anyqtaldy. Medıtsına mamandary vaktsınalaý týraly jalǵan pasporttar satqan. Olardyń quny 15 myń teńge turatyny týraly boljam bar.
«Medıtsına qyzmetkerleri, sonyń ishinde bas dárigerlerdiń mundaı áreketi jappaı vaktsınatsııa protsesin báseńdetedi. Sebebi bul jaǵdaıda dári-dármekterdi, jeke qorǵanys quraldaryn jáne medıtsınalyq maqsattaǵy buıymdardy satyp alýdy josparlaý bóliginde statıstıka ózgeredi. Bul strategııanyń kemshilikterine ákeledi. Ol qazirdiń ózinde saıası másele. Vaktsınalardy satyp alýǵa bıýdjetten kóp qarjy bólinedi. Bulaı pasport satylatyn bolsa, salyq tóleýshilerdiń aqshasy bosqa ketedi. Bul Almatydaǵy birinshi jaǵdaı emes ekenin eskere otyryp, mundaı jaǵdaılardyń aýqymy men jıiligine boljam jasaýǵa bolady», - delingen jazbada.
Almaty qalasy Qoǵamdyq densaýlyq saqtaý departamenti medıtsına qyzmetkerleriniń zańsyz áreketterin quqyq qorǵaý organdary tekserip jatqanyn habarlady.
«№ 4 emhananynyń medıtsına qyzmetkerleriniń jalǵan vaktsınatsııa pasportyn satý faktisi boıynsha materıaldar quqyq qorǵaý organdaryna berildi», - dep habarlady Qalalyq densaýlyq saqtaý basqarmasynan.
Buǵan deıin Almatyda vaktsınatsııadan ótkeni týraly elektrondyq pasport satylǵany týraly aqparatqa oraı taǵy bir emdeý mekemesinde tekseris bastalǵan bolatyn.
