Almatyda taǵy bir alaıaqtyń isi áshkerelendi
ALMATY. QazAqparat- Almatyda turǵyndarǵa memlekettik baǵdarlama boıynsha kezeksiz baspana alyp berýdi usynǵan 28 jastaǵy alaıaq ustaldy.
Bul týraly búgin Almaty qalalyq ІІD baspasóz qyzmetinen habarlady.
Almaty qalasy Naýryzbaı aýdandyq Іshki ister basqarmasynyń habarlaýynsha, bul azamat Halyqqa qyzmet kórsetý ortalyqtarynyń aldynda júrip, turǵyndarǵa belgili bir syıaqyǵa memlekettik baǵdarlama boıynsha kezeksiz baspana alyp berýge kómektese alatyndyǵyn aıtyp, usynys bildirgen.
«Almaty qalasynyń turǵyny, 1988 jyly týǵan Tımýr Alıshev ózin ákimdiktiń qyzmetkeri retinde tanystyryp, memlekettik baǵdarlama boıynsha baspana kezeginde turǵan azamattarǵa páterlerin qysqa merzimde alyp berýge kómektese alatyndyǵyn aıtyp, bul úshin belgili bir mólsherde aqsha suraıtyn bolǵan.
Árıne ol óz ýádelerin oryndamaǵan. Telefon nómirlerin jıi aýystyryp, «klıentterinen» boı tasalap júrgen. Jábirlenýshilerdiń aıtýynsha, Alıshev 22 myń AQSh dollaryn qaltaǵa basqan. Bul áreket QR QK 190-shy babynyń 3-shi tarmaǵy boıynsha (senimdi teris maqsatta paıdalaný, aldaý jolymen iri kólemde múlik urlaý) aýyr qylmystyq quqyqbuzýshylyq retinde qarastyrylady. Qazir kúdikti tutqynǵa alyndy. Endi onyń basqa da qylmystarǵa qatysy bary-joǵy anyqtalady», - dedi Naýryzbaı aýdandyq ІІB bastyǵy, polıtsııa polkovnıgi Muhıt Shaıhın.
Osyǵan baılanysty polıtsııa bólimi Tımýr Alıshevtiń áreketinen zardap shekken azamattar bar bolsa, myna telefon nómirlerine habarlasýlaryn suraıdy: 254-44-62; 254-44-64 nemese 102.
