Almatyda taǵy 50-ge jýyq kópbalaly januıa «Baqytty otbasy» arqyly baspanaly boldy
«Baqytty otbasy» baǵdarlamasy aıasynda osymen 97 januıa qoljetimdi baspanaǵa qol jetkizgen. Áli 200-den astam ótinish ıesiniń qujaty bankte qarastyrylyp jatyr, dep habarlaıdy Almaty.tv tilshisi.
13 jyldyń júzi qurqyltaıdyń uıasyndaı páter jaldap kelgen Ospanovtardyń otbasy úshin búgin - erekshe kún. Úıdiń úlkenderi turmaq, balalarǵa deıin keń páterde turatyndaryna dán rıza. Kópbalaly januıa bul baspanany «Baqytty otbasy» baǵdarlamasy arqyly qol jetkizgen.
Alǵashqy jarnasyna 500 myń teńge tólegen. Qalǵan 1 mıllıon teńge qalalyq ákimdikten sertıfıkat retinde berilgen. Jyldyq paıyzdyq mólsherlemesi nebári 2 paıyz. Otbasy alǵashqy 8 jyl - 80 myń teńgeden, qalǵan 7 jyl - 55 myń teńge tóńireginde tóleıtin bolady. Aıta keteıik, páterlerdiń qabyrǵalaryn árleý jumystaryn úı ıeleri óz qalaýy boıynsha jasaıdy eken.
«Tórtinshi balamdy bosanǵansha 13 jyl páterde turdyq. Basqa bireýge aqsha tólep otyrdyq. Bul jerde biz ózimizge tóleımiz. Páter jaldap kelgende 50-60 myń teńgeden tóledik. Qala berdi, kommýnaldy tólem taǵy bar. Báribir óz úıiń bolǵanǵa ne jetsin», - dedi Marııa Syzdyqova.
Bes balanyń anasy Smaǵulova Nazym da megapolıste 9 jyldan beri baspana jaldap kelgen. «Baqytty otbasy» baǵdarlamasyna qujattaryn ótkizgen soń, bir aıdan keıin banktiń maquldaǵanyn estigende, sener-senbesimizdi bilmedik deıdi ol. «Óz úıim-óleń tósegim» qashan bolar eken dep armandap kelgen bul otbasy da búginnen bastap ishki qurylys jumystaryna bilek sybana kirisip ketken.
«Halyqqa qyzmet kórsetý ortalyǵyna baryp, qujattaryńyzdy ótkizip kórińizder degen soń, solaı ettik. Bir aıdan keıin saıt arqyly jaýap keldi. Mine, búgin eki bólmeli páterge qol jetkizip otyrmyz. Óte baqyttymyz. Árıne, qýanyshymyz qoınymyzǵa syımaıdy. Aıtar alǵysymyz da zor. Qýanyshymyz qoınymyzǵa syımaı jatyr», - deıdi páterli bolǵan Nazym Smaǵulova.
Tórt balanyń anasy Baǵlan Jumaqanova da otbasyna tıesili 63 sharshy metr páterge ıe boldy. «Ipotekaǵa alynsa da, tapqan aqshamyzdy óz baspanamyzǵa quıatynymyz qýantady», deıdi 15 jyl boıy jaldamaly úıge 50 myń teńgeden tólep kelgen kelinshek. Al, alǵashqy jarnanyń 1 mıllıon teńgesin ákimdik tarapynan qarastyrylǵany tipti, úlken demeý boldy, deıdi ol.
«Biz kópbalaly otbasy retinde Turǵyn úı qurylys jınaq bankinde jyldyq 2 paıyzben alyp otyrmyz. Bastapqy jarnasyn 10 paıyzyn tolyq tóleı almaǵandyqtan, memleket 1 mıllıon teńge berdi. 500 myńdy ózimiz quıdyq. Bul baǵdarlama bizge jaqsy múmkindik syılady», - deıdi Baǵlan Jumaqanova.
Naýryz aıynan bastap ashylǵan «Baqytty otbasy» qalalyq baǵdarlamasynyń sharapatyn kórgenderdiń qatary mol. Sonyń ishinde dál osy turǵyn úıge qol jetkizgender - bas-aıaǵy 97 januıa. Búginde 232 ótinish ıesiniń qujaty bankte qarastyrylyp jatyr. Tólem qabilettiliginen súrinbeı ótkender, kelesi aıdyń basynda qonys toıyn toılamaq.
«Almaty qalasy boıynsha búginde 23 myńǵa jýyq adam kezekte tur. Onyń ishinde 1 700 kópbalaly ana bar. «Baqytty otbasy» baǵdarlamasy bastalǵaly beri 1 500 adam qujattaryn tapsyryp, sonyń 600-i iriktelinip alyndy», - deıdi Almaty qalasy Turǵyn úı saıasaty basqarmasy basshysynyń orynbasary Aıbek Saıdildaev.
Almaty qalasy Turǵyn úı saıasaty basqarmasy mamandarynyń aıtýynsha, baspanaǵa qol jetkizip jatqan januıalardyń kóbisi úı kezegine 1-2 jyl buryn ǵana turǵandar. Eger olar, óz kezegin kútkende áli 5-6 jyldaı ýaqyt ketedi. Al, «Baqytty otbasy» baǵdarlamasy ashylǵaly beri bir jyldyń ishinde baspanaly bolýǵa mol múmkindik berilgen. Atalǵan baǵdarlamanyń taǵy bir ońtaıly tusy - januıa qalaǵan páterin tańdaı alady.
