Almatyda taǵy 23 medıtsınalyq qyzmetker koronavırýstan emdelip shyqty
ALMATY. QazAqparat – Almatyda sońǵy 2 táýlikte 51 adam koronavırýstan emdelip shyǵaryldy. Bul týraly qalalyq Qoǵamdyq densaýlyq saqtaý basqarmasynyń basshysy Tileýhan Ábildaev onlaın brıfıng barysynda aıtty, dep habarlaıdy QazAqparat tilshisi.
Basqarma basshysy osy ýaqytqa deıin Almatyda koronavırýstyq ınfektsııadan 210 adam saýyǵyp emdeýden shyǵarylǵanyn aıtty.
«Keshe jáne búgin statsıonarlardan 51 adam emdeýden shyǵaryldy. Onyń 28-i adam vırýsy bar naýqaspen baılanysta bolǵandar jáne 23-i medıtsına qyzmetkeri. Prezıdenttiń tapsyrmasy boıynsha medıtsına qyzmetkerleriniń qaýipsizdigin qamtamasyz etý sharalary kúsheıtildi», - dedi T.Ábildaev.
Búginde Almatyda 1940 tósek-orynǵa arnalǵan 9 juqpaly statsıonar jumys isteıdi, provızorlyq emdeýge jatqyzý úshin 909 tósek-orynǵa arnalǵan 12 statsıonar, karantındik emdeýge jatqyzý úshin 1392 tósek-orynǵa arnalǵan 9 statsıonar belgilendi.
Barlyq qalalyq juqpaly aýrýlar jáne provızorlyq aýrýhanalarda bólmelerdi «taza» jáne juqtyrylǵan aımaqtarǵa bólý qaǵıdaty saqtalady. Barlyq medıtsınalyq mekemelerde jeldetý jáne beınebaqylaý júıesi jumys isteıdi. Jaýapty qyzmetkerler medıtsına qyzmetkerleriniń jeke qorǵaný quraldaryn durys kııý hattamasyn saqtaýyn qadaǵalaıdy.
Jeke qorǵanys quraldaryn kııý algorıtmin saqtaý boıynsha turaqty sabaqtar ótkizilip jatyr.
