Almatyda taǵy 17 seısmıkalyq stantsııa ornatylady

ASTANA. QazAqparat – Bıyl Almaty qalasynda 17 seısmıkalyq stantsııa ornatý josparlanǵan. Bul jaıynda QR Premer-Mınıstri Álıhan Smaıylovtyń Senat depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.

«Azamattyq qorǵaý júıesin seısmıkalyq qaýipti óńirlerdegi joıqyn jer silkinisterine daıyndaý maqsatynda «Qazaqstan Respýblıkasynyń 2021-2023 jyldarǵa arnalǵan seısmıkalyq qaýipsizdigin qamtamasyz etý jónindegi jumystyń tıimdiligin arttyrý jónindegi sharalar kesheni» jol kartasy bekitildi. Jol kartasyn iske asyrý aıasynda múddeli memlekettik organdar: oblystar aýmaǵyn egjeı-tegjeıli seısmıkalyq aýdandastyrý kartalarynyń jıyntyǵyn ázirleý; baqylaý stantsııalaryn qurý arqyly seısmologııalyq baqylaý júıelerin damytý; jer silkinisi týraly erte qulaqtandyrýdyń avtomattandyrylǵan júıelerin engizý; jer silkinisi týyndaǵan jaǵdaıda materıaldyq resýrstar men qarjylyq rezerv qurý; halyq arasynda úgit-nasıhat jumystaryn júrgizý jáne personaldy, óndiristik, jarylys-órt qaýipti obektilerdiń qyzmetkerlerin oqytý jáne basqalary qolǵa alyndy», - dedi Úkimet basshysy jaýabynda.

Onyń atap ótýinshshe, 2021 jyly Shyǵys Qazaqstan oblysy úshin 10 seısmıkalyq stantsııa satyp alynǵan.

2022 jyly baqylaý stantsııalarynyń jelisin keńeıtý maqsatynda Almaty (5 úzdiksiz tirkeý stantsııasy) jáne Shyǵys Qazaqstan oblystarynda (3 kúshti qozǵalys stantsııasy) 8 seısmıkalyq stantsııa ornatyldy.

«Sondaı-aq 2022 jyly Almaty qalasynda 11 stantsııa ornatý úshin jergilikti bıýdjetten 547 mln teńge bólindi. Al 2023 jylǵa taǵy 17 stantsııa ornatý josparlanǵan», - dedi Álıhan Smaıylov.

Premer-Mınıstr dereginshe, «Ortalyq Azııada jáne Kavkazdaǵy seısmıkalyq jelini keńeıtý» halyqaralyq ǵylymı-tehnıkalyq ortalyǵynyń jobasy aıasynda 2022 jyly 5 jańa seısmıkalyq stantsııa (Túrkistan oblysy Jetisaı qalasynda, BQO Fedorovka aýylynda, Atyraý oblysy Inderbor aýylynda, Aqtóbe oblysy Alǵa aýylynda, Qyzylorda oblysy Aqsýat aýylynda) paıdalanýǵa berildi jáne jumys istep turǵan 10 stantsııanyń jabdyqtary (Shymkent qalasynda, Abaı oblysy Semeı qalasynda, Jetisý oblysy Taldyqorǵan qalasynda oblystar, ShQO Zaısan qalasy, Qaraǵandy oblysynyń Bereznıakı aýyly, Almaty oblysynyń Talǵar jáne Shalqode aýyldary, Jambyl oblysynyń Taraz jáne Baıtal aýyldary, Túrkistan oblysynyń Jabaǵyly aýyldary) jańardy.

Sonymen qatar seısmıkalyq jabdyqtardyń bir jıyntyǵyn 2023 jyly Shyǵys Qazaqstan oblysy Ýshanov aýylynda ornatý josparlanyp otyr.

Foto: media.realitatea.net