Almatyda taekvondodan «Teketires» úlgisinde tuńǵysh ret komandalyq jarystar ótýde (Foto)
ALMATY. QazAqparat- Búgin Almatyda Balýan Sholaq atyndaǵy sport saraıynda taekvondodan ótip jatqan «Federatsııa Kýbogy» Respýblıkalyq týrnıri aıasynda «Teketires» úlgisinde elimizde tuńǵysh ret komandalyq jarystar ótýde.
«Bul jerde upaıdy bir sportshy emes, búkil komanda jınaıdy. Ár komandada bes taekvondoshydan bolady. Saıys eki raýndtan turady. Birinshi raýnd - 5 mınýt, ekinshi raýnd - 10 mınýt. Birinshi raýnda sportshylar ózara bir salmaq sanatynda shyǵady, Árbir jekpe-jekke bir mınýt ýaqyt beriledi. Al ekinshi raýnda bapker kilemge óziniń kez kelgen sportshysyn shyǵara alady. Bul jerde árbir qatysýshyǵa 30 sekýndt ýaqyt beriledi. Sol ýaqyttan keıin onyń ornyna basqa sportshy shyǵady. Upaı toqtaýsyz júrip otyrady. Bul óte qyzyqty format.
Jeńimpaz komandaǵa 1 mıllıon teńge tabys etiledi. Ekinshi oryn alǵandarǵa 500 myń teńge, al úshinshi oryndy enshilegenge 300 myń teńgeni beriledi» - dedi óz sózinde taekvondodan memlekettik jattyqtyrýshy, Qazaqstannyń taekvondo federatsııasynyń sporttyq dırektory, Beıjiń Olımpıadasynyń qola júldegeri Arman Shylmanov.
Taekvondoshylar arasyndaǵy bul jańa stıl osydan bary-joǵy úsh jyl buryn qolǵa alynǵan. Qazir ol búkil álem boıynsha tanymal bola bastady. Mamandardyń aıtýynsha, mundaı saıys sportshylardyń boıynda komandalyq rýhty qalyptastyrady. Sportshylar óziniń árbir qımylyna jaýapkershilikpen qaraıtyn bolady. Bir-birine kómektesýge qashanda daıyn turmaq. Qatelespeýge tyrysady. Óıtkeni bir sportshynyń múlt ketýi búkil komandaǵa soqqy bolyp tıedi. Sondyqtan bul jerde «Bir adam barlyǵy úshin, barlyǵy bir adam úshin» qaǵıdasy ustalady.
Osy komandalyq jarystan keıin «Federatsııa kýbogy» respýblıkalyq týrnıri márege jetedi.
