Almatyda tabylǵan este saqtaý qabiletinen aırylǵan jigitti anasy izdep keldi
ALMATY. QazAqparat - Almatyda este saqtaý qabiletinen aırylǵan jigitke anasy keldi. Esterińizge sala ketelik, jas jigit kompozıtor Erkesh Shákeevtiń ulyn izdeý barsynda tabylǵan bolatyn.
«Qalqaman shaǵyn aýdanynda Safar Shákeevti izdestirý barysynda kezdeısoq tabylǵan jigit anasymen qaýyshty. Anasy Semeıden keldi. Jigittiń esimi - Mahmud Alınov. Endi Safar Shákeevte tabylsa eken dep tileımiz. Ony qanshama adam izdep jatyr. Almatylyqtar kún saıyn bizdiń shtabqa kelip, qoldaý kórsetýde. Erikti bolyp, izdeý sharasyna qatysyp jatyr», - dedi óziniń Feısbýk áleýmettik jelisindegi jeke paraqshasynda qoǵam qaıratkeri Beknur Qısyqov.
Ol sonymen qatar, Safardyń taǵdyry úshin Reseı, Tájikstan, Ózbekstan jáne basqa da elderdiń turǵyndary da ýaıymdap jatqandyǵyn jetkizdi. Olar Safardyń tabylatyndyǵyna tilektestigin bildirip, hat jazyp jatyr.
«Halyqtyń Erkesh Shákeevke degen súıspenshigiliginiń zor ekendigi sonshalyq, búkil álem elderinen adamdar Safardyń tabylǵanyn tilep, taǵyry úshin ýaıymdap jatyr», - deıdi B. Qısyqov.
Odan basqa, ol Safar týraly óziniń esteligimen bólisti. Safar ótken jyly áleýmettik jarnama boıynsha baıqaýda birinshi oryndy jeńip alǵan eken.
«Onyń «Tabıǵatty aıalaımyz, Qazaqstandy súıemiz» dep atalatyn óte sapaly jasalǵan rolıgi, mınıfılmi júregimizdi eljiretti», - dedi ol.
Esterińizge sala ketelik, 1991 jyly týǵan Safar Shákeevtiń iz-tússiz joǵalǵany týraly aryz 2016 jyly 16 shildede Medeý aýdandyq ІІD saǵat 22:00-de kelip túsken.
