Almatyda tabıǵı órtterdi sóndirýge arnalǵan jedel top quryldy
ALMATY. QazAqparat – Almatynyń Tótenshe jaǵdaı departamentinde tabıǵı órtterdi sóndirýge arnalǵan jedel áreket etýshi top quryldy, dep habarlaıdy QazAqparat tilshisi.
«Eger karantın jaǵdaıynda biz qylmys deńgeıiniń tómendegenin baıqasaq, órt oqıǵalary boıynsha jaǵdaı buryńǵy qalpynda. Osy jyldyń birinshi toqsanynda órt sany bir oqıǵaǵa azaıyp, barlyǵy 138 órt oqıǵasy tirkeldi, 3 adam qutqarylyp, 58 adam qaýipti aımaqtardan evakýatsııalandy»,– dedi Almaty qalalyq TJD basshysy Serik Áýbákirov brıfıng barysynda.
Onyń aıtýynsha, qazir kún ysyp ketýine baılanysty qurǵaq shópter men qoqystardyń órtenýi oryn alýda. 1 aqpannan bastap qurǵaq shóptiń janýy boıynsha 175 jaǵdaı tirkelip, órt 29 gektar jerdi sharpydy. Bul ótken jyldyń osy kezeńimen salystyrǵanda 13% - ǵa artyq. Qurǵaq shópterdiń órtenýi kóbine Túrksib, Alataý, Medeý aýdandarynda oryn alady.
Sonymen qatar, ol kúshter men qurylymdardyń jaýyngerlik daıyndyq deńgeıin arttyrý úshin TJD-de tabıǵı órtterdi sóndirýge arnalǵan jedel áreket etýshi top qurylǵanyn atap ótti.
Jalpy, taý-orman alqabynda joǵary deńgeıdegi órt týyndaǵan jaǵdaıda ony sóndirýge 300-den astam jeke quram, joǵary qozǵaltqyshtaǵy 23 birlik tehnıka, 500 qapshyqtaǵy órt sóndirgishi, 500 kúrek jáne 156 jarylǵyshtar daıyn tur.
Sondaı-aq, Іle – Alataý ulttyq parkiniń balansynda 6 órt munarasy, 1 órt sóndirý kóligi, 4 motor sorǵysy, 88 qapshyqtaǵy órt sóndirgish, 1263 jarylǵysh, 106 balta, 4 bilezik tizbek jáne 322 kúrek bar.
Sonymen qatar, órtterdi sóndirý jáne avarııalyq-qutqarý jumystaryn júrgizý úshin Almaty qalasy ákimdigi 109 qutqarý qyzmetiniń jáne QR ІІM TJK «Qazavıaqutqarý» AQ-yń tikushaqtary qatysady.
Taýly-ormandy jerlerde órtterdiń aldyn alý úshin jyl saıyn jergilikti polıtsııamen birlesip patrýldeý júrgiziledi. Ótken jyly 400-den astam ot jaǵý jaǵdaıǵa tyıym salyndy, 35 jeke tulǵa ákimshilik jaýapkershilikke tartyldy.
