Almatyda "Tabıǵı organıkalyq aýylsharýashylyq jáne salaýatty tamaq ónimderi, azyq- túlik qaýipsizdigi negizi retinde" atty halyqaralyq konferentsııa ótip jatyr
dep habarlaıdy QazAqparat.
Halyqaralyq Sloý Fýd uıymy men Qazaq Ulttyq agrarlyq ýnıversıtetiniń Joǵarǵy fermerler mektebiniń uıymdastyrýymen ótip jatqan sharaǵa elimizdiń jáne shet eldiń ǵalymdary men sarapshylary, fermerlik uıymdardyń ókilderi, halyqaralyq jobalardyń jetekshileri men fermerlik sharýashylyqtyń basshylary qatysýda.
«Bul shara elimizde birinshi ret ótkizilip otyr. Onyń maqsaty - taza, dámdi, tabıǵı taǵamdardy, ásirese, ulttyq, dástúrli tamaq ónimderin nasıhattaý, taza ónimderdiń paıdalylyǵyn aıta otyryp, tamaqty asyqpaı, bappen ishýge shaqyrý, halyqqa durys tamaqtanýdy nasıhattaý, fast-fýd syndy tamaqtardan aýlaq bolýǵa shaqyrý. Sonymen qatar, azyq-túlik ónimderin shyǵarýshylar, sharýa qojalyqtary men mal ósirýshilerdiń eńbegine qurmetpen qaraýǵa shaqyra otyryp, eńbek aqysyn adal tóleý bolyp tabylady», dedi Sloý Fýd uıymynyń Konvıvıým jetekshisi Hanym Ahmetova.
Qazaq taǵamtaný akademııasynyń prezıdenti Tóregeldi Sharmanovtyń aıtýynsha, dúnıe júzin jaýlap alǵan fast-fýd syndy tez arada tamaqtaný túrinen góri, Sloý Fýd uıymynyń ustanymy durys. «Tamaqtyń tazasyn, ulttyń burynnan qalyptasqan uǵymyna sáıkes tamaqtaný, halyqtyń ereksheligine qaraı tamaqtaný jáne asyqpaı otyryp as qabyldaý óte durys. Biz ózimizge jetip turǵan tamaǵymyzdy durys paıdalanbaımyz. Sondyqtan, qazir ulttyq deńgeıde óndirý máselesin jaqsartý kerek», dedi ol. Onyń aıtýynsha, Keńestik dáýirde taza emes taǵamdar óte kóp bolǵan, qazirgi ýaqytta ol másele azaıyp kele jatyr.
Konferentsııa sheńberinde dástúrli ulttyq taǵam ónimderiniń kórmesi ótti. Oǵan konferentsııaǵa qatysýshy qazaqstandyq fermerler óz ónimderin usyndy.
Anyqtama úshin: Sloý Fýd - halyqaralyq kommertsııalyq emes, ekogastronomııalyq qoǵamdyq uıym. Bul uıym 1989 jyly tez tamaqtaný dástúrine qarsy jaýap retinde qurylyp, jumysy - asyqpaı tamaqtanýdy nasıhattaýǵa, tabıǵı azyq-túlikterdi qorǵaýǵa baǵyttalǵan.
