Almatyda syrtqy týrızmdi damytý úshin barlyq jaǵdaı jasalady
ALMATY. QazAqparat - Almatyda ótken qoǵamdyq keńes otyrysynda syrtqy týrızm salasyn damytý máselesi talqylandy, dep habarlaıdy QazAqparat tilshisi.
Qalalyq Týrızm jáne syrtqy baılanystar basqarmasynyń basshysy Erlan Jaılaýbaıdyń aıtýynsha, sheteldikterdiń Almatyǵa jetýi tym uzaq ýaqytty alady.
Osy olqylyqtyń ornyn toltyrý úshin búginde áýe jelileri qatary kóbeıip kele jatyr. Mysaly Reseı áýe kompanııasy Almaty-Krasnoıarsk- Irkýtsk baǵytynda áýe reısin ashty. Sibirden keletin týrısterge basqa esh jerge qonaqtaýdyń qajeti joq. Latvııalyq tasymaldaýshy da Rıgadan Almatyǵa tikeleı reıs ashty.
«Azamattyq avıatsııa komıteti basshylyǵymen osy baǵytta ózara túsinistik ornady. Fınlıandııadaǵy Helsınkı qalasyna baryp, FinAir kompanııasymen kelissózder júrgizdik. Soltústik Eýropa men Ortalyq Azııanyń arasyn biriktirý úshin. Alaıda, kelissózden soń olar Astanaǵa reıs ashý týraly sheshimde qaldy. Biz óz tarapymyzdan Almatynyń ekonomıkalyq turǵydan da, týrıstik turǵydan da áleýetiniń mol ekenin barynsha jetkizýge tyrystyq. Alaıda, áýe kompanııasy Almatyǵa reıs ashatyn bolsa, olar munda bólek ekıpaj ustaýǵa tıis bolady. Bul kóp shyǵyndy talap etedi»,- dedi basqarma basshysy Erlan Jaılaýbaı.
Vızalyq rejimge kelsek, QR SІM jyl sońyna deıin 23 vızalyq elge elektrondy vıza engizýdi josparlap otyr.
Bul sheteldik týrısterdiń Almatyǵa, Qazaqstanǵa kelýine jol ashady.
«Týrızm salasyndaǵy jetistikterimizge kóńilimiz tolady, árıne. Biraq, bul biz qozǵalatyn qarqyn emes. Atqaratyn jumys áli jeterlik», - dedi basqarma basshysy.
Qoǵamdyq keńes músheleri Almatydaǵy týrıstik nysandardy aralap shyqqandaryn, alaıda týrıstik oryndardan bir de bir sheteldik týrısti kezdestirmegenderin aıtty.
Basqarma basshysy Erlan Jaılaýbaı jyl saıyn Almatyǵa keletin sheteldik týrısterdiń sany 14%-ǵa artyp otyrǵanyn jetkizdi.
«Memlekettik qyzmet usynǵan ótken jyldyń qorytyndysyna sáıkes byltyr Almatyǵa 500 myńnan asa adam kelgen. Al, ornalasý oryndarynan kelgen aqparatqa sáıkes 350 myń adam qonaq úı qyzmetin paıdalanǵanyn bilemiz», - dedi E.Jaılaýbaı.
Búginde almatylyq týrızm salasynyń ókilderi Azııa men Eýropadaǵy týrıstik kórmelerge qatysyp júr. Byltyr Almaty týraly aqparat «BBC» men «Euronews» arnalarynda jarııalanǵan.
Visit Almaty ortalyǵy Qazaqstannyń ár óńirinen týrıst tartýda belsendi eńbek etip jatyr.
Otyrysta Visit Almaty ortalyǵyn tolyqtyrý týraly birqatar másele talqylandy.
Visit Almaty dırektory Kamıla Lýkpanova saıtty qaıta jasaý úshin mamandar jaldanǵanyn aıtty.
