Almatyda syrqattar emdelý sapasyna kóńili tolmasa basshylyqqa shaǵymdana alady
ALMATY. QazAqparat - Búgin Almatyda Búkilálemdik qaterli isikke qarsy kúres kúni aıasynda Qazaq onkologııa jáne radıologııa ǵylymı-zertteý ınstıtýtynda «Belsendi naýqas» jobasynyń tusaýy kesildi. Oǵan atalmysh ınstıtýttyń basshylyǵy, onkologııa salasynyń mamandary, dárigerler jáne BAQ ókilderi qatysty.
«Belsendi naýqas» jobasy - turǵyndardyń aryz-tilekterin elektrondy túrde jetkizý joly, ıaǵnı ınstıtýt basshylyǵymen baılanys. Naýqastar em-shara unamasa nemese ózge tilekteri bar bolsa, sol týraly jazyp, ınstıtýt basshylyǵyna tez habardar ete alady. Bul jańa júıeniń bir ereksheligi, munda aty-jóni joq adamdardyń aryz-ótinishteri qabyldanbaıdy. Degenmen, mamandar jumysyna aryzdanýshy naýqastyń ári qaraıǵy em-domy qalypty júretin bolady, oǵan eshqandaı qysym kórsetilmeıdi. Oǵan kepildik beriledi», - dedi óz sózinde Qazaq onkologııa jáne radıologııa ǴZI dırektorynyń orynbasary Dáýlet Baıpeısov.
«Belsendi naýqas» jobasy aıasynda satyp alynǵan bankomatqa uqsas elektrondy qurylǵylar ınstıtýttyń árbir korpýsyna ornatyldy. Naýqastar oǵan kelip, ekranda kórsetilgen arnaıy fýnktsııalary arqyly qazaq nemese orys tilinde ınstıtýt basshylyǵy atyna aryz-shaǵymyn jaza alady.
Budan ózge, Qazaq onkologııa jáne radıologııa ǴZI dırektorynyń orynbasary onkologııalyq aýrýlardy alǵashqy satylarynda anyqtaýda birqatar jetistikterge qol jetkizilgenin aıtty.
«Qaterli isikke shaldyǵý yqtımaldyǵy Soltústik, Shyǵys Qazaqstanda basym. Al ońtústik óńirlerde kórsetkishter tómen. Buǵan ekologııalyq faktorlar áser etedi. Biraq, qazir elimizde skrınıng baǵdarlamalary óz nátıjesin berip jatyr. Máselen, bıyl skrınıng arqyly qaterli isiktiń alǵashqy satysynda anyqtalǵan jaǵdaılar elimizde 57 paıyzǵa kóbeıdi, al sońǵy 3-4 satysynda belgili bolǵandary - 8 paıyzdy quraıdy. Jyl sanap skrınıngke keletinder sany artyp keledi», - dedi Dáýlet Baıpeısov.
Sondaı-aq, búgingi shara barysynda ınstıtýtta jańadan call-ortalyqtyń iske qosylǵandyǵy jarııa etildi. Táýlik boıy úzdiksiz jumys isteıtin call-ortalyq qyzmetkerleri endi naýqastardyń jaqyndary men emdelýshilerge kez-kelgen suraq boıynsha qajetti aqparatty bere alady.
Aıta ketelik, Qazaq onkologııa jáne radıologııa ǵylymı-zertteý ınstıtýtynyń málimeti boıynsha, onkologııalyq aýrýlar elimizde ólim-jitim kórsetkishi boıynsha ekinshi orynda tur. Jyl saıyn 16-17 000 adam qaterli dertpen aýyryp, sonyń sebebinen kóz jumady. Al olardyń 42 paıyzy - eńbekke jaramdy jastaǵylar.
2016 jyldyń 1-shi aqpanyna bastap, Qazaq onkologııa jáne radıologııa ǵylymı-zertteý ınstıtýynda barlyq turǵyndar úshin qaterli isik skrınınginiń 6 túri boıynsha tegin tekserý sharalary júrgizilip jatyr. Ol 10-shy aqpanǵa deıin jalǵasady.
