Almatyda syrǵanaq tepken 4 bala aýyr jaraqat aldy
ALMATY. QazAqpara - Almatyda syrǵanaq tepken tórt bala aýyr jaraqat aldy. Dárigerler almatylyqtardy demalysta qaýipsizdik erejelerin saqtaýǵa shaqyrady, dep habarlaıdy QazAqparat tilshisi.
Jańa jyldyq mereke kúnderi Balalar shuǵyl medıtsınalyq kómek kórsetý ortalyǵyna 14 jasar eki bala, 16 jáne 6 jastaǵy barlyǵy tórt bala tústi.
Tóbeshikten joǵary jyldamdyqpen syrǵanap kele jatqan alty jasar bala basqa balamen soǵylyp qalǵan.
«Saldarynan kishkentaı bala jabyq bas súıek-mı jaraqatyn alyp, sol tóbe súıeginiń jelisi syndy. Jazyq epıdýraldy gematoma dıagnozy qoıyldy. Qazirgi kezde bala jansaqtaý bóliminde jatyr», - deıdi Almaty qalasy Balalar shuǵyl medıtsınalyq kómek kórsetý ortalyǵy travmatologııa bólimshesiniń meńgerýshisi Baqyt Qojahanov.
Muz aıdynynda aýyr jaraqat alǵan 14 jastaǵy qyz qarqyndy terapııa bólimine jatqyzyldy, jaǵdaıy turaqtanǵannan keıin mamandandyrylǵan bólimshege aýystyryldy.
«Muz aıdynynda bortpen soqtyǵysý saldarynan jasóspirimniń kókbaýyry jarylyp, ishine qan ketip, ishi tuıyq jaraqat alǵan. Ota jasaldy, qazir balanyń jaǵdaıy turaqty, bólimshede baqylaýda jatyr. Ata-analarǵa sporttyń kez kelgen túri jáne ashyq aýada ótkiziletin is-sharalar kezinde qaýipsizdik erejelerin muqııat saqtaý kerek ekenin eskertemin», - deıdi dáriger hırýrgııa bólimshesiniń mengerýshisi Erlan Júsipbekov.
Muz aıdynynda jaraqat alǵan taǵy bir naýqas 16 jasar qyz aýrýhanada jatyr. Dárigerler balaǵa jabyq bassúıek-mı jaraqaty, mı shaıqalý, tóbe aımaǵy jumsaq tinderiniń soǵylýy dıagnozyn qoıdy. Boıjetken jansaqtaý bólimine jatqyzyldy, keıin neırohırýrgııa bólimshesine aýystyryldy.
Sondaı-aq 3 qańtarda 14 jastaǵy jasóspirim Ortalyqqa jatqyzyldy, ol Shymbulaq taý shańǵysy kýrortynan jetkizildi. Ańǵyrt syrǵanaý nátıjesinde balada jabyq bassúıek-mı jaraqaty, bas mıynyń shaıqalýy, tóbe aımaǵynyń soǵylýy anyqtaldy.
«Balalardyń qaýipsizdigi men densaýlyǵy basty basymdyq bolyp qalýy kerek. Balaǵa shańǵymen syrǵanaýǵa ruqsat bermes buryn, jabdyqtyń tolyq jıyntyǵyna kóńil bólý kerek, balanyń qorǵanys dýlyǵasy bolýy kerek. Úlken qarly tóbeshikter - bizdiń muń: munda jaraqat alý múmkindigi óte joǵary, balalar ómir súrý sapasyna áser etetin aýyr jaraqattar alady. Biz balalardyń densaýlyǵy men ómirin birge saqtaýǵa shaqyramyz», - dep qosty neırohırýrgııa bólimshesiniń mengerýshisi Muhtar Ibragımov.
