Almatyda sybaılas jemqorlyqty habarlaǵandarǵa qansha syıaqy beriledi

ALMATY. QazAqparat - Almatyda sybaılas jemqorlyq týraly habarlamaǵa beriletin syıaqy mólsheri qylmystyń túrine qaraı beriledi. Bul týraly Sybaılas jemqorlyqqa qarsy is-qımyl ulttyq bıýrosy departamenti basshysy Erjan Ibragımov aıtty, dep habarlaıdy QazAqparat tilshisi.

«Sybaılas jemqorlyqqa qatysty habarlamaǵa beriletin syıaqy qylmystyń túrine baılanysty. Ol 96 200 teńgeden bastalyp 240 500 teńgege deıin barady. Eger jeńil qylmys bolsa onda habarlaýshy 40 AEK kóleminde, ıaǵnı 96200 teńge ala alady. Eger bul ortasha deńgeıdegi qylmys bolatyn bolsa 50 AEK ıaǵnı 120 250 teńge, al aýyr qylmys túrin habarlaǵan kisige 70 AEK kóleminde 168 350 teńge beriledi. Óte aýyr degen qylmys týraly habarlaǵanǵa 100 AEK ıaǵnı 240 500 teńge beriledi»,-dedi Erjan Ibragımov.

Onyń aıtýynsha, bıyl Almatyda sybaılas jemqorlyq jóninde habar taratqandarǵa  900 myń teńgedeı aqsha jumsalǵan. Al byltyr 3 mln kóleminde aqsha bólingen.

Sondaı-aq spıkerdiń aıtýynsha, bıyl  sybaılas jemqorlyqqa qarsy is-qımyl ulttyq bıýrosy departamenti men 54 qylmystyq is qozǵalyp, onyń 40-y sotqa jiberilgen. 18 tulǵa ákimshilik jaýapkershilikke tartylǵan.

«Keltirilgen zalal kólemi 170 mıllıondy quraıdy, onyń barlyǵy qaıtaryldy. Bıýro quziretine sybaılas jemqorlyqqa baılanysty  quqyq buzýshylyqtar men qylmystardy anyqtaý kiredi.  Bizdiń tarapymyzdan  QR qylmystyq-protsestik kodeksiniń 200 babyn ujymdyq ortada túsindirý jumystary júrgizilýde. Bul qylmystyń aldyn alýǵa kómektesedi degen oıdamyz»,-dedi Erjan Ibragımov.