Almatyda Sybaılas jemqorlyqqa qarsy qyzmettiń respýblıkalyq shtaby ashyldy
Memleket basshysy Qazaqstan halqyna arnaǵan Joldaýynda ortaq mindet - «Halyq únine qulaq asatyn memleket» tujyrymdamasyn júzege asyrýdy tapsyrdy. Zamanaýı memlekettik apparat azamattarmen ózara árekettesýdiń jańa tásilderin ashyp, protsester algorıtmderin azaıtyp, jumys sapasyn jaqsartýy kerek.
«Qarasha aıynyń sońynda Sybaılas jemqorlyqqa qarsy is-qımyl agenttigi janynan respýblıkalyq aqparattyq úgit-nasıhat shtaby quryldy. Shtabtyń maqsaty — halyqpen syndarly dıalog qurý, keń aqparat taratý arqyly adaldyq qaǵıdattaryn damytý» delingen ákimdik habarlamasynda.
Shtab turǵyndardyń ártúrli toptary úshin túrli tásilderdi qoldana otyryp, aqparattyq-nasıhattaý jınalystaryn ótkizedi. Qazir aqparattyq-nasıhattaý shtaby elimizdiń barlyq oblystarynda jumys isteı bastady. Bul úgit-nasıhat shtabynyń basty maqsaty – turmystyq jemqorlyqpen kúresý.
27 qarashada Respýblıkalyq shtab óziniń aǵartýshylyq qyzmetin Almatyda bastady.
Shtab ókilderi – rejısser Ermek Tursynov, qoǵam qaıratkeri Yrza Tursynzada jáne Sybaılas jemqorlyqqa qarsy qyzmettiń ókili Arman Berdalın qalanyń birqatar joǵary oqý oryndarynda bolyp, Almaty qalasy ákimdigi men polıtsııa departamentiniń qyzmetkerlerimen kezdesti. Sonymen qatar shtab ókilderi aımaqtyq aqparattyq shtab múshelerimen júzdesti.
«Júrgizilip jatqan aqparattyq-túsindirý jumystary halyqtyń quqyqtyq saýattylyǵyn arttyrýǵa jáne sybaılas jemqorlyqqa oryn joq memleket qurýdaǵy azamattyq qoǵamnyń kúsh-jigerin shoǵyrlandyrýǵa múmkindik beredi», - dedi kezdesý barysynda shtab jetekshisi Yrza Tursynzada.