Almatyda «Súıinbaı» spektakliniń premerasy qoıyldy
ALMATY. QazAqparat - Muhtar Əýezov atyndaǵy qazaq memlekettik akademııalyq drama teatrynda dramalyq epos janryndaǵy "Súıinbaı" spektakliniń tusaýkeseri ótti, dep habarlaıdy QazAqparat tilshisi.
Qoıylym HІH ǵasyrda qyrǵyz-qazaq jerinde ótken halyq ahýalynan kórinis beredi. Qazaqtyń basyn jınap ımperııaǵa qarsy kúres uıymdastyrǵan Han Kene kóterilisiniń qaıǵyly aıaqtalýy, oǵan sebep bolǵan qazaqtyń ózara alaýyzdyǵy sýretteledi.
Dramalyq epostyń basty keıipkeri - qazaq aıtys óneriniń atasy Súıinbaı Aronuly.
Qoıylymdy sahnalaǵan rejısser Murat Ahmanovtyń aıtýynsha, Qyrǵyzdyń manaptarynyń qolynan qaza bolǵan Han Keneniń taǵdyry bərinen buryn Súıinbaı aqynnyń janyna batqan.
"Osy oqıǵanyń kýəgeri, Han Keneniń taǵdyry janyna batqan Súıinbaı beınesi halyqty biriktirý jolynda kórinis tabady. Qazaqtyń osyndaı beıshara halge túsken sətinde ǵumyr keshken aqyn osynyń bərine shydaı almastaı bolady", - dedi Murat Ahmanov.
Sol zamandaǵy qyrǵı-qabaq aǵaıynnyń qandy qyrǵynyn beıneleıtin qoıylym qazaq pen qyrǵyzdyń bir kezderi irgesi sýyp, qalaısha qaıta ymyraǵa kelgenin baıandaıdy.
"Jetisý boıyn mekendegen qazaq rýlarynyń bıleýshisi - Tezek tóre birde Súıinbaıdy qyrǵyz hany Ormannyń sheshesiniń asyna ertip barady. Eki el arasyndaǵy jıynda Súıinbaı men Qataǵan aıtysy bastalyp ketedi. Sonda el qazaqtyń uly halyq ekenin, qyrǵyz ben bir týǵandyǵyn tanıdy. Ekeýi kúsh biriktirse ǵana ımperııaǵa qarsy bas kótere alatynyn túsinedi", - dedi rejısser Muhtar Ahmanov.
Spektakl Iran-Ǵaıyptyń pesasy jelisine qurylǵan.
