Almatyda súıektiń qaterli isigine shaldyqqan 40-tan astam balaǵa kúrdeli ota jasaldy
ALMATY. QazAqparat – Respýblıkalyq pedıatrııa jáne balalar hırýrgııasy ǵylymı ortalyǵynda balalardaǵy osteosarkomalar kezinde iri býyndardy endoprotezdeý boıynsha biregeı operatsııalar jasalýda, dep habarlaıdy QazAqparat tilshisi Pedıatrııa ortalyǵyna silteme jasap.
Osteosarkoma – súıektiń sırek kezdesetin qaterli isigi. Bul dert 10 jastan asqan balalarda jıi kezdesedi. Elimizde jyl saıyn osteosarkoma aýrýyna shamamen 15 jasóspirim shaldyǵady. Barlyq osteosarkomanyń 50%-dan astamy tize býynyna jaqyn ornalasqan.
Sońǵy jyldary súıek isikteri kezinde joǵary mólsherli hımıoterapııany engizýdiń arqasynda metastazanyń tómendeýi baıqalady. Bul kóptegen jaǵdaılarda (90%-dan astam) zaqymdanǵan aıaqty saqtaýǵa múmkindik berdi. ıAǵnı, joǵaryda atalǵan patologııasy bar balalardyń aıaq-qolyn kespeıdi.
«Pedıatrııa jáne balalar hırýrgııasy ǵylymı ortalyǵynda balalar men jasóspirimderdiń súıek sarkomasy kezinde endoprotezderdi qoldaný arqyly aıaq-qoldy saqtap qalý boıynsha ota jasaý 2012 jyldan beri júrgiziledi. Ortalyqtyń zamanaýı modýldik endoprotezderdi satyp alý múmkindiginiń jáne qarqyndy joǵary mólsherli hımıoterapııany qoldanýdyń arqasynda organsaqtaýshy ádispen ota jasaýdyń múmkindigi artty. Sondaı-aq balalardaǵy osteosarkomany biriktirip emdeý nátıjeleri de jaqsardy. Aıta ketsek, onkologııalyq endoprotezder ortopedııalyq protezderge uqsas emes, erekshe megaprotezder bolyp tabylady. Qazirgi tańda hırýrgııalyq emdeýdiń osy túri osteosarkomaǵa shaldyqqan balalardyń 90%-dan astamyna jasalady, ol óz kezeginde balanyń áleýmettik beıimdelýi men onyń ómir súrý sapasynyń jaqsarýyna múmkindik týǵyzyp otyr» - deıdi onkohırýrg Bahram Jumadillaev.
Aıaq-qoldy saqtaı otyryp emdeý aıaqtalǵannan keıin jalpy saýyǵyp ketý jaǵdaılary elimizde 70%-dy quraıdy. Bul nátıje osteosarkomany zertteý jónindegi halyqaralyq mýltıortalyqtar nátıjesiniń derekterimen saı keledi.
Sońǵy 5 jyl ishinde Pedıatrııa jáne balalar hırýrgııasy ǵylymı ortalyǵynda iri býyndardy endoprotezdeı otyryp (tize, ıyq, jambas) osteosarkoma kezinde 45 dene múshesin saqtap qalýdyń da sáti tústi. Sondaı-aq balalardyń aıaq-qoldarymen qosa, olardyń ómir súrý sapasy da jaqsardy.
