Almatyda sút bezderiniń qaterli isigin emdeýge arnalǵan halyqaralyq konferentsııa ótip jatyr

dep habarlaıdy QazAqparat.

Búgingi otyrys barysynda mamandardy daıyndaý, qaıta daıyndaý, kómek sapasyn arttyrý máseleleri talqylandy. Sarapshylardyń aıtýynsha, onkologııalyq aýrýlarmen aýyratyn  adamdardy emdeıtin joǵary mamandandyrylǵan medıtsınalyq kómektiń sapasyn kóterý kerek jáne sút bezderiniń qaterli isigine tıimdi skrınıng jasaýda,  sonymen qatar dıagnostıkalaý men  terapııa kezinde  eýropalyq sapa standartyn engizý qajet. Eýropalyq qoǵamnyń prezıdenti, Italııadan kelgen ǵalym-dáriger Marko Rosselı Del Týrkonyń aıtýynsha, bul problema tek Qazaqstanda ǵana emes, búkil álemde úlken máselelerdiń biri bolyp otyr. «Eýropa elderinde sút bezderiniń qaterli isigi 1-shi orynda tur. Degenmen, jańa emdeý ádisteriniń arqasynda ólim jaǵdaılary azaıyp keledi», deıdi Marko Rosselı Del Týrko. 

«Bizdiń mamandardyń biliktilikterin arttyrý maqsatynda Italııa, Germanııa, Ulybrıtanııa elderine baryp, úırenip qaıtýlary  josparlanýda. Olar ázirge, osy apta boıy uıymdastyrylǵan sheberlik synyptarynda úırenýde. Jyl sońynda osy shara jalǵasyn tabatyn bolady», dedi onkologııa jáne radıologııa ǵylymı-zertteý ınstıtýtynyń dırektory Jetkergen Arzyqulov. Onyń aıtýynsha, Qazaqstanda jylyna bul dertpen aýyratyn 3000 áıel tirkelgen. 2008 jyly sút bezderiniń qaterli isigi aýrýynan 1335 adam kóz jumǵan. «Eger adamdar ýaqytynda tekserilýge kelgende, bul kórsetkishtiń sany anaǵurlym az bolar edi», deıdi J. Arzyqulov.

Sońǵy 20 jylda osy dert álem boıynsha mıllıonnan asa áıeldiń ómirin áketken. Jalpy, adam ólimi boıynsha sút bezderiniń qaterli isigi 3-shi orynda bolyp otyr.

Sonymen qatar, jıynda  jaqynda qabyldanǵan sút bezderiniń qaterli isigin anyqtaý, dıagnostıkalaý men emdeýdeýdiń jańa ádisterin engizý   baǵdarlamasy tanystyryldy.

Halyqaralyq konferentsııa aıasynda  apta boıy  ótetin «Sút bezderiniń qaterli isigin anyqtaý, dıagnostıkalaý men emdeý» atty sheberlik synyptary jalǵasýda. Onda Eýropa elderinen kelgen ǵalym-dárigerler   bizdiń dárigerlermen óz tájirıbelerimen bólisip, ár túrli trenıngter ótkizýde.