Almatyda sýrrogat ana ómirge úshem ákeldi
ASTANA. QazAqparat - Almatyda sýrrogat ana ómirge úshem ákeldi, dep habarlaıdy Almaty.tv.
Dárigerlerdiń aıtýynsha, bul - buryn-sońdy bolmaǵan erekshe oqıǵa. Bastapqyda jatyryn jalǵa bergen anaǵa tek eki uryq salynypty. Biraq keıinnen onyń bireýi ekige bólinip, nátıjesinde dúnıege úshem kelgen. Aıy-kúni jetpeı týǵan shaqalaqtardyń qazir jaǵdaıy qalypty. Salmaǵy bir jarym keliden aspaıtyn sábıler arnaıy kıývezde jatyr.
«Úshem bolatynyn múldem kútpedik, bizdiń ortalyqta mundaı qubylys birinshi ret bolyp tur. Bıologııalyq ata-ana bizge ózderi kelip sýrrogat áıeldiń kómegimen sábıli bolǵysy keletinin aıtty. Olardy birden tirkeýge alyp, densaýlyqtaryn tekserip, EKO arqyly uryqtandyrýǵa daıyndadyq. Nátıjesi sátti bolyp, ómirge bir qyz, eki ul keldi. Qazir sýrrogat ananyń kómegimen sábıli bolatyndar óte kóp. Bul bir jaǵynan kóptegen otbasyn ajyrasyp ketýden saqtaıdy», - dedi Akýsherııa, gınekologııa jáne perınatologııa ǵylymı ortalyǵynyń reprodýktolog dárigeri Radha Sharıpova.
Aq halattylardyń málimetinshe, úshemniń bıologııalyq ata-anasynyń bir balasy bar. Alaıda, olarǵa tuńǵyshynan soń qaıta sábı súıý baqyty buıyrmapty. Kóp balaly bolýdy arman etken erli-zaıypty uzaq oılana kele, aqyry sýrrogat ananyń kómegine júgingen. Tipti, qursaq-anany ózderi izdep taýypty. Jatyryn satqan 26 jastaǵy áıeldiń ózi eki perzentin tárbıelep otyr eken. Kelinshek tapsyryspen qursaq kóterýge aqshaǵa muqtajdyqtan barǵan kórinedi. Biraq mundaı protsedýra úshin qansha syıaqy alǵany belgisiz. Qos tarap kelisimshartty notarıýspen bekitken.
